തിരുവനന്തപുരം : നവകേരള സദസ്സിലെ ‘രക്ഷാപ്രവർത്തന’ പ്രസ്താവനയിൽ മുഖ്യമന്ത്രി പിണറായി വിജയനെതിരേ അന്വേഷണത്തിന് ഉത്തരവിട്ട് എറണാകുളം സിജെഎം കോടതി. മുഖ്യമന്ത്രിയുടെ നേതൃത്വത്തിൽ നടന്ന നവകേരള സദസിനിടയിൽ പ്രതിഷേധിച്ച യൂത്ത്കോൺഗ്രസ് അടക്കമുള്ള പ്രതിപക്ഷ സംഘടനാ പ്രവർത്തകരെ ഡിവൈഎഫ്ഐ,സിപിഎം പ്രവർത്തകർ ആക്രമിച്ചിരുന്നു. പലപ്പോഴും പോലീസിന്റെ മുന്നിൽ വച്ചതായിരുന്നു ഈ ആക്രമണങ്ങൾ. എന്നാൽ ഇതിനെ രക്ഷാപ്രവർത്തനം എന്ന രീതിയിലാണ് മുഖ്യമന്ത്രി പലയിടത്തും പരാമർശിച്ചത്.
ഇത് കുറ്റകൃത്യം തുടരാനുള്ള പ്രേരണയാണ് എന്ന രീതിയിൽ എറണാകുളം ഡിസിസി പ്രസിഡന്‍റ് മുഹമ്മദ് ഷിയാസ് സമർപ്പിച്ച പരാതിയിലാണ് എറണാകുളം സി.ജെ.എം. കോടതി എറണാകുളം സെൻട്രൽ പോലീസിന് അന്വേഷണത്തിന് നിർദ്ദേശം നൽകിയത്.
