കല്പ്പറ്റ: ഫോണിലൂടെ അശ്ലീലചുവയോടെ സംസാരിച്ചെന്ന യുവതിയുടെ പരാതിയില് നടന് വിനായകനെ അറസ്റ്റ് ചെയ്ത ശേഷം ജാമ്യത്തില് വിട്ടയച്ചു. വിനായകന്റെ മൊഴി രേഖപ്പെടുത്തിയ ശേഷമാണ് സ്റ്റേഷന് ജാമ്യത്തില് വിട്ടത്.
പൊലീസ് വിളിച്ചു വരുത്താതെ, വിനായകന് സ്വമേധയാ സ്റ്റേഷനിലെത്തി മൊഴി രേഖപ്പെടുത്തുകയായിരുന്നു. പരാതിക്കാരിയായ യുവതിയും സ്റ്റേഷനിലെത്തി മൊഴിനല്കി.
അഭിഭാഷകനൊപ്പമാണ് വിനായകന് കല്പ്പറ്റ സ്റ്റേഷനിലെത്തിയത്. യുവതിയെ ശല്യപ്പെടുത്തരുതെന്ന് പൊലീസ് വിനായകന് നിര്ദേശം നല്കി.
എന്നാല് യുവതിയോടല്ല ആദ്യം ഫോണില് വിളിച്ച പുരുഷനോടാണ് സംസാരിച്ചതെന്ന് വിനായകന് പൊലീസിന് മൊഴി നല്കി.
യുവതിയുടെ മൊഴി പൊലീസ് കഴിഞ്ഞ ദിവസം രേഖപ്പെടുത്തിയിരുന്നു. കേട്ടാല് അറയ്ക്കുന്ന രീതിയില് നടന് തന്നോട് സംസാരിച്ചെന്നാണ് യുവതിയുടെ മൊഴി. വിനായകന് സംസാരിച്ച ഫോണ് റെക്കോര്ഡ് പൊലീസിന് മുന്നില് യുവതി ഹാജരാക്കിയിരുന്നു.
കഴിഞ്ഞ ഏപ്രില്മാസം വയനാട്ടില് ദളിത് പെണ്കുട്ടികള്ക്കായി സംഘടിപ്പിച്ച ക്യാമ്പിലേക്ക് ക്ഷണിക്കുന്നതിനായി വിനായകനെ ഫോണില് വിളിച്ചപ്പോള് ലൈംഗികച്ചുവയോടെ സംസാരിച്ചെന്നാണ് യുവതിയുടെ പരാതി.
വിനായകനില് നിന്നുണ്ടായ മോശം പെരുമാറ്റത്തെക്കുറിച്ച് യുവതി ഫേസ്ബുക്കില് വെളിപ്പെടുത്തിയത് സമൂഹ മാധ്യമങ്ങളില് വലിയ ചര്ച്ചയായിരുന്നു.