ധാക്ക: ബംഗ്ലാദേശിലെ ധാക്കയില്‍ രാസവസ്തുക്കളുടെ സംഭരണശാലയിലുണ്ടായ തീപിടുത്തത്തില്‍ 56 പേര്‍ വെന്തുമരിച്ചു. നിരവധി പേര്‍ കെട്ടിടത്തിനുള്ളില്‍ കുടുങ്ങി കിടക്കുന്നതായാണ് റിപ്പോര്‍ട്ട്. ബുധനാഴ്ച രാത്രി 10.40നാണ് തീപിടിമുണ്ടായത്. രക്ഷാപ്രവര്‍ത്തനം പുരോഗമിച്ചുവരികായാണ്.
45 പേര്‍ക്ക് പരിക്കേറ്റതായാണ് വിവരം. പരിക്കേറ്റ പലരുടെയും നില ഗുരുതരമാണ്. ഇവരെ സമീപത്തെ ആശുപത്രിയില്‍ പ്രവേശിപ്പിച്ചു. മരണസംഖ്യ ഉയരാന്‍ സാധ്യതയുണ്ടെന്ന് അധികൃതര്‍ അറിയിച്ചു.ധാക്കയിലെ ചൗക്ക്ബസാറിലുള്ള കെമിക്കല്‍ ഗോഡൗണാണ് തീപിടിച്ചത്. തീ വളരെ വേഗം സമീപത്തെ കെട്ടിടങ്ങളിലേക്കും പടര്‍ന്നു. വലിയ സ്ഫോടന ശബ്ദത്തോടെ തീപിടിക്കുകയായിരുന്നുവെന്ന് ദൃക്സാക്ഷികള്‍ പറഞ്ഞു.
ഗോഡൗണിന് സമീപത്തുള്ള ഒരു കെട്ടിട്ടത്തില്‍ വിവാഹ പാര്‍ട്ടി നടന്നിരുന്നു. ഇവിടെ പാര്‍ട്ടിക്ക് എത്തിയവര്‍ക്കും തീപിടിത്തത്തില്‍ പൊള്ളലേറ്റു. തീപിടിത്തത്തെ തുടര്‍ന്നു ഗതാഗത കുരുക്ക് ഉണ്ടായതിനാല്‍ ആളുകള്‍ക്ക് രക്ഷപ്പെടാന്‍ സാധിച്ചില്ലെന്നും അധികൃതര്‍ പറഞ്ഞു. 200 അഗ്നിശമനസേന ഉദ്യോഗസ്ഥരാണ് തീയണയ്ക്കാന്‍ ശ്രമം നടത്തുന്നത്. രണ്ട് കാറുകളും പത്ത് സൈക്കിള്‍ റിക്ഷകളും പൂര്‍ണമായും കത്തിനശിച്ചു.
