പൊടുന്നനെ ശരീരഭാരം കുറക്കാന്‍ ശ്രമിച്ചാല്‍ അത് എല്ലാവര്‍ക്കും ഒരുപോലെ നല്ലതാകണമെന്നില്ല. തിന് പിന്നില്‍ പല ആരോഗ്യപ്രശ്‌നങ്ങളും ഒളിച്ചിരിപ്പുണ്ട്. അവ ഏതെല്ലാമെന്ന് നോക്കാം.
പേശികള്‍ക്ക് ബലക്ഷയം ഉണ്ടാകും
പല ഡയറ്റീഷ്യന്മാരും വേഗത്തില്‍ തടി കുറയ്ക്കരുത് എന്ന് പറഞ്ഞു കേട്ടിട്ടുണ്ടാകും. അതിനുപിന്നിലെ പ്രധാന കാരണങ്ങളില്‍ ഒന്നാണ് പേശികള്‍ക്ക് ഉണ്ടാകുന്ന ബലക്ഷയം. നമ്മളുടെ ശരീരത്തിന് ബലം നല്‍കുന്നതിനും അതുപോലെ, ശരീരഭംഗി നിലനിര്‍ത്തുന്നതിനും പേശികളുടെ ആരോഗ്യം മുഖ്യമാണ്.
എന്നാല്‍, കൃത്യമായ രീതിയില്‍ പതിയെ തടി കുറയ്ക്കാതെ ഒറ്റയടിക്ക് തടി കുറയ്ക്കാന്‍ ശ്രമിക്കുമ്പോള്‍ ഇത് പേശികളുടെ ആരോഗ്യത്തെ കാര്യമായി ബാധിക്കുന്നു. മസില്‍സിന് വീക്കം സംഭവിക്കുന്നതിലേയ്ക്ക് വരെ ഇത് നയിക്കുന്നു.അതിനാല്‍, ഡയറ്റിനോടൊപ്പം മസില്‍സ് ബലപ്പെടുത്തുന്നതിന് വേയ്റ്റ് ഇട്ട് വര്‍ക്കൗട്ട് ചെയ്യണം എന്ന് പറയുന്നത് ഇതുകൊണ്ടാണ്.
പോഷക ശോഷണം സംഭവിക്കും
തടി കൂട്ടാന്‍ ശ്രമിക്കുന്നവര്‍ മാത്രമല്ല, തടി കുറയ്ക്കാന്‍ ശ്രമിക്കുന്നവരും ശരീരത്തിന് ആവശ്യമായിട്ടുള്ള പോഷകങ്ങള്‍ കൃത്യമായ അളവില്‍ ഡയറ്റില്‍ ചേര്‍ത്ത് എത്തിക്കേണ്ടത് അനിവാര്യമാണ്. സാധാരണ ഗതിയില്‍ വേഗത്തില്‍ തടി കുറയ്ക്കാന്‍ ശ്രമിക്കുന്നവരില്‍ പലരും വേണ്ടത്ര പോഷകങ്ങള്‍ ഉള്‍പ്പെടുത്താന്‍ മറന്നു പോകുന്നു.
മെറ്റബോളിസത്തില്‍ വ്യതിയാനം
നമ്മളുടെ ശരീരത്തില്‍ മെറ്റബോളിസം വര്‍ദ്ധിക്കുമ്പോഴാണ് ശരീരഭാരം കുറയുന്നത്. ഒരു ദിവസം എത്ര കലോറി കുറയ്ക്കണം എന്നത് നമ്മളുടെ മെറ്റബോളിസത്തെ അടിസ്ഥാനപ്പെടുത്തിയാണ് ഇരിക്കുന്നത്. നമ്മള്‍ കഴിക്കുന്ന ഭക്ഷണത്തെ എനര്‍ജിയാക്കി മാറ്റി എടുക്കുന്നതും മെറ്റബോളിസം തന്നെ.
എന്നാല്‍, നമ്മള്‍ കലോറി കുറഞ്ഞ ആഹാരങ്ങള്‍ കഴിക്കുമ്പോള്‍ സാധാരണയില്‍ നിന്നും 23% കുറവാണ് കലോറി ഒരുദിവസം എരിയിച്ച് കളയുക. ഇത് നമ്മളുടെ ശരീരത്തിലെ മെറ്റബോളിസത്തില്‍ വ്യതിയാനം ഉണ്ടാക്കുകയും ഇത് തടി കുറച്ചാലും കുറച്ച് കഴിയുമ്പോള്‍ വേഗത്തില്‍ തടി വെക്കാനുള്ള സാധ്യതയും കൂട്ടുന്നു.
പിത്താശയത്തില്‍ കല്ല്
പിത്താശയത്തില്‍ കൊഴുപ്പ് അലിയാതെ കിടക്കുന്നത് മൂലമാണ് പിത്താശയത്തില്‍ കല്ല് രൂപപ്പെടുന്നത്. ഇത് വന്നാല്‍ നല്ല വേദനയും അസ്വസ്ഥതയും അുഭവപ്പെടാം. ചില പഠനങ്ങള്‍ പറയുന്നത് പ്രകാരം, പെട്ടെന്ന് തടി കുറയ്ക്കാന്‍ ശ്രമിക്കുന്നവരില്‍ പിത്താശയ കല്ല് വരാനുള്ള സാധ്യതയും കൂടുതലാണെന്ന് പറയുന്നു.
നമ്മള്‍ ആവശ്യത്തിന് ആഹാരം കഴിക്കാതിരിക്കുമ്പോള്‍ പിത്താശയരസം പിത്താശയ കല്ലുകളായി മാറുന്നു. അതിനാല്‍, പെട്ടെന്ന് തടി കുറയ്ക്കുന്നവര്‍ക്ക് ഈ രോഗം വരാനുള്ള സാധ്യതയും മുന്നില്‍ കാണണം.
നീര്‍ജലീകരണം
നമ്മള്‍ പെട്ടെന്ന് ശരീരഭാരം കുറയ്്ക്കാന്‍ ശ്രമിക്കുമ്പോള്‍ ഇത് ശരീരത്തില്‍ നിന്നും നല്ല അളവില്‍ വെള്ളത്തിന്റെ സാന്നിധ്യവും കുറയ്ക്കുന്നു. ഇത്തരത്തില്‍ വെള്ളം കുറയുമ്പോള്‍ നിര്‍ജലീകരണം സംഭവിക്കുന്നു.നിര്‍ജലീകരണം സംഭവിച്ചാല്‍ അമിതമായിട്ടുള്ള ക്ഷീണം, തലവേദന, മലബന്ധം എന്നീ പ്രശ്‌നങ്ങള്‍ ഉണ്ടാകാനുള്ള സാധ്യതയും വളരെയധികം കൂടുതലാണ്.
ഇലക്ട്രോലൈറ്റ് ഇംബാലന്‍സ്
ശരീരത്തില്‍ പെട്ടെന്നുണ്ടാകുന്ന മാറ്റങ്ങള്‍ നമ്മളുടെ ശരീരത്തിന് അത്രപെട്ടെന്ന് സ്വീകാര്യമായിരിക്കുകയില്ല. ഇത് ശരീരത്തിന്റെ മൊത്തത്തിലുള്ള പ്രവര്‍ത്തനം അവതാളത്തിലാക്കാന്‍ സാധ്യത വളരെയധികം കൂടുതലാണ്. പ്രത്യേകിച്ച് ഇലക്ട്രോലൈറ്റ്‌സ് താളം തെറ്റുകയും ഇത് ശരീരത്തെ കാര്യമായി ബാധിക്കുകയും ചെയ്യുന്നു.ഇത്തരത്തില്‍ ഇലക്ട്രോലൈറ്റ്‌സില്‍ ഉണ്ടാകുന്ന വ്യതിയാനം ഹൃദ്രോഗങ്ങള്‍ക്കുള്ള സാധ്യത വളരെയധികം കൂട്ടുന്നുണ്ട്. അതിനാല്‍, നല്ലരീതിയില്‍ മാത്രം ശരീരഭാരം കുറയ്ക്കാന്‍ ശ്രദ്ധിക്കാം.
