ബെംഗളൂരു : കാറിന് മുകളിലേക്ക് കണ്ടെയ്നര് ലോറി മറിഞ്ഞുണ്ടായ അപകടത്തിൽ രണ്ടുകുട്ടികളടക്കം ഒരു കുടുംബത്തിലെ ആറുപേര്ക്ക് ദാരുണാന്ത്യം. ബെംഗളൂരു റൂറലിലെ നീലമംഗലയ്ക്ക് സമീപം ഇന്ന് രാവിലെ പതിനൊന്ന് മണിയോടെ ദേശീയപാത 48-ലാണ് അപകടമുണ്ടായത്. വിജയപുരയിലേക്ക് ക്രിസ്മസ് അവധിക്കാലം ആഘോഷിക്കാന് പോകുകയായിരുന്നു അപകടത്തിനിരയായ കുടുംബം. ബെംഗളൂരുവില് നിന്ന് തുമകുരുവിലേക്ക് പോകുകയായിരുന്നു കണ്ടെയ്നര് ലോറി.
കാറും ലോറിയും ഒരേ ദിശയിലായിരുന്നു സഞ്ചരിച്ചിരുന്നത്. ഇതിനിടെ മറ്റൊരു ട്രക്കുമായി കണ്ടെയ്നര് ലോറി കൂട്ടിയിടിച്ചു. രണ്ടു ട്രക്കുകളും മറിഞ്ഞു. കണ്ടെയ്നര് ലോറി കാറിന് മുകളിലേക്കാണ് മറിഞ്ഞത്. കാറിലുണ്ടായിരുന്ന ആറുപേരും സംഭവ സ്ഥലത്ത് വെച്ചുതന്നെ മരിച്ചതായാണ് വിവരം. ക്രെയിനുംമറ്റും ഉപയോഗിച്ചാണ് കണ്ടെയ്നര് ലോറി കാറിന് മുകളില്നിന്ന് മാറ്റിയത്. മൃതദേഹങ്ങള് നീലമംഗല സര്ക്കാര് ആശുപത്രി മോര്ച്ചറിയിലേക്ക് മാറ്റി
