കൊച്ചി : വ്യവസായി ഫാരിസ് അബൂബക്കറിന്റെ വീടുകളിലും അനുബന്ധ സ്ഥാപനങ്ങളിലും ആദായ നികുതി വകുപ്പിന്റെ റെയ്ഡ്. രാജ്യത്തെ 70 കേന്ദ്രങ്ങളിലാണ് പരിശോധന നടക്കുന്നത്.കൊച്ചിയിലും കൊയിലാണ്ടിയിലും ദില്ലിയിലും ചെന്നെയിലും മുംബൈയിലും പരിശോധന തുടരുകയാണ്. ആദായ നികുതി ഇൻവെസ്റ്റിഗേഷൻ വിഭാഗമാണ് പരിശോധന നടത്തുന്നത്. റിയൽ എസ്റ്റേറ്റ് ഇടപാടുകളിലെ കള്ളപ്പണ നിക്ഷേപവുമായി ബന്ധപ്പെട്ടാണ് റെയ്ഡ്.
തിങ്കളാഴ്ച രാവിലെ എട്ട് മണി മുതലാണ് പരിശോധന ആരംഭിച്ചത്. 92 റിയൽ എസ്റ്റേറ്റ് കമ്പനികൾ ഫാരിസിന്റേതായി ആദായ നികുതി വകുപ്പ് കണ്ടെത്തിയിട്ടുണ്ട്. ഈ കമ്പനികളുടെ പേരിൽ വിവിധയിടങ്ങളിൽ ഫാരിസിന് ഭൂമി ഇടപാടുകളുണ്ട്. കമ്പനികളിൽ രാഷ്ട്രീയ നിക്ഷേപമുണ്ടെന്നും ആദായ നികുതി വകുപ്പ് സംശയിക്കുന്നുണ്ട്. നിലവിൽ ഫാരിസ് ലണ്ടനിലാണുള്ളത്. അടിയന്തരമായി ഹാജരാകാൻ ഫാരിസിനോട് ആദായ നികുതി വകുപ്പ് നിർദേശിച്ചിട്ടുണ്ട്.
