ദില്ലി: കടുത്ത സാമ്പത്തിക പ്രതിസന്ധി നേരിടുന്ന ശ്രീലങ്കയ്ക്ക് പ്രതിരോധ രംഗത്തും പിന്തുണ നൽകി ഇന്ത്യ. ശ്രീലങ്കൻ വ്യോമസേനയിലേയും നാവിക സേനയിലേയും സേനാംഗങ്ങളെ ഇന്ത്യ പരിശീലിപ്പിക്കും. ഇതിനായി ഇന്ത്യൻ നാവിക സേനയുടെ അഡ്വാൻസ്ഡ് ലൈറ്റ് ഹെലികോപ്ടർ ശ്രീലങ്കൻ എയർബേസിൽ എത്തിക്കഴിഞ്ഞു. ഒരാഴ്ച്ചയാണ് ഇവർക്ക് പരിശീലനം നൽകുക.
ലങ്കൻ എയർഫോഴ്സ് പൈലറ്റുമാർക്ക് ഇന്ത്യയുടെ അഡ്വാൻസ്ഡ് ലൈറ്റ് ഹെലികോപ്റ്റർ പരിചയപ്പെടുത്താനും കോ-പൈലറ്റ് അനുഭവം നൽകാനുമാണ് പരിശീലനത്തിലൂടെ ലക്ഷ്യമിടുന്നത്. ശ്രീലങ്കൻ നാവിക സേനയുടെ അഡ്വാൻസ്ഡ് ഓഫ്ഷോർ പട്രോൾ വെസ്സൽ ആയ സയൂരാലയിൽ പരിശീല സംഘം വിപുലമായ ഡെക്ക് ലാൻഡിംഗ് പരിശീലനം നടത്തി. ഇരുരാജ്യങ്ങളിലേയും സായുധ സേനകൾ തമ്മിലുള്ള ബന്ധമാണ് ഇതിലൂടെ ശക്തിപ്പെടുക.
അതേസമയം സാമ്പത്തിക പ്രതിസന്ധി നേരിടുന്ന ശ്രീലങ്കയ്ക്ക് ആശ്വാസമായി ഇന്ത്യ സഹായം എത്തിച്ചു. ഭക്ഷണവും മരുന്നും ഉൾപ്പെടെയുള്ള അവശ്യ വസ്തുക്കളുടെ ഇറക്കുമതിയ്ക്കായി നൂറ് കോടി ഡോളർ കൂടിയാണ് ഇന്ത്യ വായ്പയായി നൽകുന്നത്. കഴിഞ്ഞമാസം പെട്രോളിയം ഉത്പ്പന്നങ്ങൾ വാങ്ങാൻ ഇന്ത്യ 50 കോടി ഡോളർ രാജ്യത്തിന് വായ്പ നൽകിയിരുന്നു.
