ടെഹ്‌റാൻ : ഒമാൻ തീരത്ത്, ഷിനാസ് തുറമുഖത്തിന് സമീപത്തായി കെമിക്കൽ ടാങ്കറിന് നേരെ ഇറാൻ കോസ്റ്റ് ഗാർഡ് വെടിവയ്പ്പ് നടത്തിയതായി റിപ്പോർട്ട്. ടോഗോ പതാകയേന്തിയ എം.ടി. സൈറോൺ എന്ന കപ്പലിന് നേരെയാണ് ഏപ്രിൽ 25-ന് ആക്രമണമുണ്ടായത്. കപ്പലിലുണ്ടായിരുന്ന 12 ഇന്ത്യൻ നാവികരും സുരക്ഷിതരാണെന്ന് കേന്ദ്ര തുറമുഖ, ഷിപ്പിംഗ്, ജലപാത മന്ത്രാലയം അറിയിച്ചു. മന്ത്രാലയം ഡയറക്ടർ മൻദീപ് സിംഗ് രൺധാവയാണ് ഇക്കാര്യം ഔദ്യോഗികമായി സ്ഥിരീകരിച്ചത്.
മറ്റ് കപ്പലുകൾക്കൊപ്പം സഞ്ചരിക്കുകയായിരുന്ന എം.ടി. സൈറോണിനെ ഇറാൻ കോസ്റ്റ് ഗാർഡ് തടയുകയും മുന്നറിയിപ്പായി വെടിവയ്ക്കുകയുമായിരുന്നു. സംഭവത്തെത്തുടർന്ന് കപ്പലിലെ ഇന്ത്യൻ ജീവനക്കാരുടെ സുരക്ഷ ഉറപ്പാക്കാൻ വിദേശകാര്യ മന്ത്രാലയവുമായും ഇന്ത്യൻ മിഷനുകളുമായും മാരിടൈം സ്റ്റേക്ക്‌ഹോൾഡർമാരുമായും തുറമുഖ മന്ത്രാലയം നിരന്തരമായി ബന്ധപ്പെട്ടുവരികയാണ്. കപ്പലിലെ ജീവനക്കാരും സമുദ്രയാന പ്രവർത്തനങ്ങളും സുരക്ഷിതമാണെന്ന് ഉറപ്പാക്കാൻ മന്ത്രാലയം പ്രതിജ്ഞാബദ്ധമാണെന്നും അധികൃതർ വ്യക്തമാക്കി.
കഴിഞ്ഞ കുറച്ചു ദിവസങ്ങളായി ഹോർമുസ് കടലിടുക്കിന് സമീപം കപ്പലുകൾക്ക് നേരെ സമാനമായ ആക്രമണങ്ങൾ നടന്നിരുന്നു. നേരത്തെ വി.എൽ.സി.സി സൻമാർ ഹെറാൾഡ്, ജഗ് അർണവ്എന്നീ ഇന്ത്യൻ കപ്പലുകൾക്ക് നേരെയും സമാനമായ രീതിയിൽ ആക്രമണങ്ങൾ നടന്നിരുന്നു. ഹോർമുസ് കടലിടുക്കിലെ ഗതാഗത നിയന്ത്രണങ്ങൾ ഇറാൻ പുനഃസ്ഥാപിച്ചതായും, അമേരിക്കൻ ഉപരോധങ്ങൾ പിൻവലിക്കുന്നത് വരെ ചരക്ക് നീക്കത്തിന് തടസ്സം നിൽക്കുമെന്നും ഇറാൻ നേരത്തെ പ്രഖ്യാപിച്ചിരുന്നു. നിലവിലെ സാഹചര്യത്തിൽ മേഖലയിൽ ഇന്ത്യൻ കപ്പലുകളുടെ സുരക്ഷ ഉറപ്പാക്കാൻ വിദേശകാര്യ മന്ത്രാലയം അതീവ ജാഗ്രത പുലർത്തുന്നുണ്ട്.
