ഇസ്ലാമാബാദ്: ആർട്ടിക്കിൾ-370 റദ്ദാക്കിയതോടെ പാക്കിസ്ഥാനും ഇന്ത്യയും തമ്മിലുളള അതിർത്തി തർക്കം രൂക്ഷമാകുന്നു. ഇതിനിടെ ഇന്ത്യൻ അനുകൂല പോസ്റ്ററുകൾ ഇസ്ലാമാബാദിൽ ഉയർന്നു. ചൊവ്വാഴ്ച മുതലാണ് ഇസ്ലാമാബാദിലെ അതിസുരക്ഷ മേഖയിലുൾപ്പടെ മൂന്നിടങ്ങളിൽ ബാനറുകൾ പ്രത്യക്ഷപ്പെട്ടത്. ഇന്ന് കാശ്മീർ നാളെ ബലൂചിസ്ഥാനും പാക്ക് അധീന കശ്മീരും പിടിച്ചെടുക്കും മോദി സർക്കാർ അതിൽ വിജയിക്കുമെന്നും ഉൾപ്പടെയുളള വാക്യങ്ങളുമാണ് ബാനറിലുണ്ടായിരുന്നത്.
എന്നാൽ ഈ പോസ്റ്ററുകൾ ഡിസൈനർക്ക് പറ്റിയ പിഴവെന്ന വിശദീകരണവുമായാണ് പാക്കിസ്ഥാൻ ഇപ്പോള് രംഗത്തെത്തിയിരിക്കുന്നത്. ബാനർ തയ്യാറാക്കിയവരുടെ ഭാഷാ പ്രാവീണ്യമില്ലായ്മയാണ് ബാനറിലെ ഇന്ത്യൻ അനുകൂല മുദ്രവാക്യങ്ങൾക്ക് കാരണമെന്ന് മുതിർന്ന പാക് ഉദ്യോഗസ്ഥൻ പറഞ്ഞു.
ഇന്ത്യൻ സർക്കാരിന്റെ വിഘടന,സർവാധിപത്യ നയങ്ങളെ തുറന്നുകാട്ടാനും അത്തരം നീക്കം നടത്താൻ ആവില്ലെന്നുമാണ് ബാനറിൽ എഴുതാൻ ഉദ്ദേശിച്ചതെന്നാണ് പാക്കിസ്ഥാന്റെ വിശദീകരണം. സംഭവവുമായി ബന്ധപ്പെട്ട് ഏതാനും പേരെ അറസ്റ്റ് ചെയ്ത് അന്വേഷണം പൂർത്തിയായതായി ഇസ്ലാമാബാദ് കമ്മീഷണർ ഹംസ ഷഫ്ഖാത് പറഞ്ഞു.
