ബംഗളൂരു: സംസ്ഥാനം വരൾച്ചക്കെടുതി അഭിമുഖീകരിക്കുമ്പോൾ കർണ്ണാടക മുഖ്യമന്ത്രി ആഡംബര ജെറ്റിൽ പറക്കുകയാണെന്ന് ബി.ജെ.പിയുടെ വിമർശനം. കേന്ദ്രത്തിൽനിന്ന് വരൾച്ചാ സഹായം തേടാൻ പോയ മുഖ്യമന്ത്രിയും രണ്ടു മന്ത്രിമാരും ആഡംബര ജെറ്റിലാണ് യാത്രചെയ്തത്. മുഖ്യമന്ത്രി സിദ്ധരാമയ്യ, റവന്യൂ മന്ത്രി കൃഷ്ണബൈരെ ഗൗഡ, ഹജ്ജ് -വഖഫ് മന്ത്രി സമീർ അഹമ്മദ് ഖാൻ എന്നിവർ സ്വകാര്യ ആഡംബര ജെറ്റിൽ സഞ്ചരിക്കുന്ന വിഡിയോ ദൃശ്യം ബി.ജെ.പി കർണാടക അദ്ധ്യക്ഷൻ ബി.വൈ. വിജയേന്ദ്ര സമൂഹമാധ്യമമായ എക്സിൽ പങ്കുവെച്ചു.
വരൾച്ചാ ദുരിതാശ്വാസത്തിന് കേന്ദ്രസഹായം തേടി മടങ്ങവെയാണ് ഈ ആഡംബര സഞ്ചാരമെന്നും നമ്മൾ നേരിട്ട ദുരന്തത്തെ പരിഹസിക്കുകയാണ് ഈ പ്രവൃത്തിയിലൂടെ ചെയ്തതെന്നും വിജയേന്ദ്ര വിമർശിച്ചു.
സിദ്ധരാമയ്യ ഡൽഹിയിൽ വന്നത് കോൺഗ്രസിലെ കാര്യങ്ങൾക്കായാണെന്നായിരുന്നു കേന്ദ്രമന്ത്രി പ്രഹ്ളാദ് ജോഷിയുടെ പ്രതികരണം. കർണാടകയിലെ ബോർഡുകളിലെയും കോർപറേഷനുകളിലെയും നിയമനം സംബന്ധിച്ച കാര്യത്തിനാണ് സിദ്ധരാമയ്യ വന്നത്. സിദ്ധരാമയ്യയും ശിവകുമാറും തമ്മിലുള്ള തർക്കം അവർക്ക് പരിഹരിക്കേണ്ടതുണ്ടായിരുന്നു. ഡൽഹി സന്ദർശനത്തിനിടെ പ്രധാനമന്ത്രിയെയും കണ്ടു, ജോഷി കുറ്റപ്പെടുത്തി.
