നടി കാവ്യാ മാധവന് ഇന്ന് 38-ാം പിറന്നാള്. ബാലതാരമായി വെള്ളിത്തിരയില് എത്തി പിന്നീട് മലയാളികളുടെ നായികാ സങ്കല്പ്പം തന്നെ മാറ്റിമറിച്ച താരമാണ് കാവ്യ മാധവന്. താരത്തിന് പിറന്നാള് ആശംസകള് നേര്ന്നുകൊണ്ട് നിരവധി ആരാധകരാണ് എത്തിയത്.
പി. മാധവന്, ശ്യാമള എന്നിവരുടെ മകളായി 1984 സെപ്റ്റംബര് 19ന് കാസര്ഗോഡ് ജില്ലയിലെ നീലേശ്വരത്തായിരുന്നു കാവ്യയുടെ ജനനം. നീലേശ്വരം ജി.എല്.പി. സ്കൂള്, രാജാസ് ഹൈസ്കൂള് എന്നിവടങ്ങളില് നിന്നും വിദ്യാഭ്യാസം പൂര്ത്തിയാക്കി. വര്ഷങ്ങളോളം കാസര്ഗോഡ് ജില്ലയിലെ കലാതിലകമായിരുന്നു കാവ്യ.
പൂക്കാലം വരവായ് എന്ന ചിത്രത്തിലൂടെയാണ് കാവ്യ സിനിമയില് അരങ്ങേറ്റം കുറിച്ചത്. ദിലീപ് നായകനായെത്തിയ ചന്ദ്രനുദിക്കുന്ന ദിക്കില് എന്ന ചിത്രത്തിലാണ് കാവ്യ ആദ്യമായി നായികയാകുന്നത്.
അഴകിയ രാവണന്, തിളക്കം, റണ്വെ, കൊച്ചിരാജാവ്, ലയണ്, ചക്കരമുത്ത്, പാപ്പി അപ്പച്ചാ, ഗദ്ദാമ, വെള്ളരിപ്രാവിന്റെ ചങ്ങാതി, ക്രിസ്ത്യന് ബ്രദേഴ്സ്, ക്ലാസ്മേറ്റ്സ്, ഈ പട്ടണത്തില് ഭൂതം, തെങ്കാശിപ്പട്ടണം, ഡാര്ലിംഗ് ഡാര്ലിംഗ്, ദോസ്ത്, മീശമാധവന്, മിഴി രണ്ടിലും, സദാനന്ദന്റെ സമയം, പെരുമഴക്കാലം തുടങ്ങിയ നിരവധി ചിത്രങ്ങളില് കാവ്യ ശ്രദ്ധേയമായ പ്രകടനം കാഴ്ചവച്ചു. 2004ലും 2011ലും കാവ്യയ്ക്ക് മികച്ച നടിക്കുള്ള സംസ്ഥാന പുരസ്കാരം ലഭിച്ചിട്ടുണ്ട്
2009ല് ബിസിനസുകാരനായ നിഷാല് ചന്ദ്രയെ വിവാഹം കഴിച്ചെങ്കിലും രണ്ട് വര്ഷത്തിന് ശേഷം ഇരുവരും നിയമപരമായി വേര്പിരിഞ്ഞു പിന്നീട് 2016ല് നടന് ദിലീപിനെ കാവ്യ വിവാഹം കഴിച്ചു. പ്രതിസന്ധികളെയും വിവാദങ്ങളെയുമെല്ലാം അതിജീവിച്ച് സന്തോഷകരമായി മുന്നോട്ടുപോകുകയാണ് ഇരുവരും.