സാൻഫ്രാൻസിസ്കോ : അമേരിക്കയിലെ സാൻഫ്രാൻസിസ്കോയിൽ ഇന്ത്യൻ കോൺസുലേറ്റിനു നേരെ ഖലിസ്ഥാൻ അനുകൂലികളുടെ ആക്രമണം. ലണ്ടനിലെ ഹൈക്കമ്മിഷൻ ഓഫിസിനു മുന്നിലെ ഇന്ത്യൻ പതാക നീക്കിയതിനു തൊട്ടുപിന്നാലെയാണ് സാൻഫ്രാൻസിസ്കോയിലെ ആക്രമണം. കോൺസുലേറ്റിൽ എത്തിയ ഖലിസ്ഥാൻ അനുകൂലികൾ ഗ്ലാസ് ഡോറുകളും വാതിലുകളും അടിച്ചു തകർക്കുകയും സ്പ്രേ പെയിന്റ് ഉപയോഗിച്ച് ‘ഫ്രീ അമൃത്പാൽ’ എന്നെഴുതുകയും കെട്ടിടത്തിനു മുകളിൽ ഖലിസ്ഥാൻ പതാക നാട്ടുകയും ചെയ്തു.
ആക്രമണം നടക്കുന്ന സമയത്ത് പശ്ചാത്തലത്തിൽ പഞ്ചാബി സംഗീതവും കേൾക്കാൻ സാധിക്കുന്നുണ്ട് . ഖലിസ്ഥാൻ നേതാവ് അമൃത്പാല് സിങ്ങിനായി നടത്തുന്ന തിരച്ചിലില് പ്രതിഷേധിച്ചായിരുന്നു ആക്രമണം. നേരത്തെ ലണ്ടനിലെ ഇന്ത്യന് ഹൈക്കമ്മിഷന് ഓഫിസിനു മുന്നില് ഇന്ത്യയുടെ ദേശീയപതാക ഖലിസ്ഥാന് അനുകൂലികള് നീക്കിയതില് ഇന്ത്യ ബ്രിട്ടനെ പ്രതിഷേധം അറിയിച്ചിരുന്നു.
സുരക്ഷാവീഴ്ചയില് വിശദീകരണം തേടിയ ഇന്ത്യ, അലംഭാവം അംഗീകരിക്കില്ലെന്നും വ്യക്തമാക്കി. കുറ്റക്കാരെ ഉടന് പിടികൂടണമെന്നും ആവശ്യപ്പെട്ടിട്ടുണ്ട്.