കോട്ടയം: നിർമ്മാണ ജോലിക്കിടയിൽ മണ്ണിടിഞ്ഞ് അപകടം. കോട്ടയം മറിയപ്പള്ളിയിലാണ് സംഭവം നടന്നത്.
ഒരാൾ മണ്ണിനടിയിൽപ്പെട്ടു. മൂന്ന് പേരെ രക്ഷപ്പെടുത്തി. മണ്ണിനടിയിൽപ്പെട്ടയാളെ പുറത്തെടുക്കാനുള്ള രക്ഷാപ്രവർത്തനം തുടരുന്നു. എന്നാൽ രക്ഷാപ്രവർത്തനത്തിനിടെ വീണ്ടും മണ്ണിടിഞ്ഞത് പ്രതിസന്ധി സൃഷ്ടിച്ചിരുന്നു.
അന്യസംസ്ഥാന തൊഴിലാളിയാണ് മണ്ണിനടിയിൽപ്പെട്ടത്. ചിങ്ങവനം പോലീസും കോട്ടയത്ത് നിന്നുള്ള അഗ്നിശമന സേനയും ചേർന്നാണ് രക്ഷാപ്രവർത്തനം നടത്തുന്നത്. രാവിലെ 9 മണിക്ക് ശേഷമാണ് അപകടം ഉണ്ടായത്.
രാത്രി പ്രദേശത്ത് വലിയ രീതിയിൽ മഴ ഉണ്ടായിരുന്നു. ഉയരം കൂടിയ പ്രദേശം ആയിരുന്നു. ഇവിടെ മതിൽ കെട്ടുന്നതിന് തൊഴിലാളികൾ മണ്ണ് മാറ്റുന്നതിനിടെയാണ് മുകളിൽ നിന്ന് മണ്ണ് ഇടിഞ്ഞ് വീണത്. ഈ സമയം അപകടത്തിൽപ്പെട്ടയാളെ രക്ഷിക്കാൻ ശ്രമിക്കുന്നതിനിടെ വീണ്ടും മണ്ണ് ഇടിഞ്ഞ് വീണു. ഇപ്പോൾ ജെസിബി ഉപയോഗിച്ച് മണ്ണ് മാറ്റുകയാണെന്ന് പ്രദേശവാസികൾ പറഞ്ഞു.