ദില്ലി : മുൻ ടെന്നീസ് താരം ലിയാണ്ടർ പേസിന് കേന്ദ്ര ആഭ്യന്തര മന്ത്രാലയം ‘എക്സ്’ കാറ്റഗറി സുരക്ഷ അനുവദിച്ചു. പശ്ചിമ ബംഗാൾ നിയമസഭാ തെരഞ്ഞെടുപ്പിന് മുന്നോടിയായി താരം രാഷ്ട്രീയ പ്രവർത്തനം ശക്തമാക്കുന്ന സാഹചര്യത്തിലാണ് കേന്ദ്രത്തിന്റെ ഈ നീക്കം. രാഷ്ട്രീയത്തിൽ കൂടുതൽ സജീവമാകുന്നതോടെ സുരക്ഷാ ഭീഷണികൾ കണക്കിലെടുത്താണ് ആഭ്യന്തര മന്ത്രാലയത്തിന്റെ നടപടി.
കഴിഞ്ഞ ആഴ്ച ദില്ലിയിൽ വെച്ചാണ് അമ്പത്തിരണ്ടുകാരനായ ലിയാണ്ടർ പേസ് ബിജെപിയിൽ അംഗത്വമെടുത്തത്. രാഷ്ട്രീയ പ്രവേശനത്തെ ഒരു ഔദ്യോഗിക ചടങ്ങായല്ല, മറിച്ച് രാജ്യത്തെ സേവിക്കാനുള്ള ഉത്തരവാദിത്തമായാണ് കാണുന്നതെന്ന് അദ്ദേഹം വ്യക്തമാക്കിയിരുന്നു. നേരത്തെ മമത ബാനർജിയുടെ നേതൃത്വത്തിലുള്ള തൃണമൂൽ കോൺഗ്രസുമായി സഹകരിച്ചു പ്രവർത്തിച്ചിരുന്ന പേസ് മുൻ തിരഞ്ഞെടുപ്പുകളിൽ പാർട്ടിക്ക് വേണ്ടി പ്രചാരണത്തിനിറങ്ങുകയും ചെയ്തിരുന്നു. എന്നാൽ പേസിന്റെ ബിജെപി പ്രവേശനത്തെ ‘പുറത്തുനിന്നുള്ള ഒരാളെ’ സംസ്ഥാന രാഷ്ട്രീയത്തിലേക്ക് കൊണ്ടുവരുന്നു എന്നാരോപിച്ച് ടിഎംസി വിമർശിച്ചു.
ബംഗാൾ നിയമസഭാ തെരഞ്ഞെടുപ്പിനുള്ള ബിജെപിയുടെ താരപ്രചാരകരുടെ പട്ടികയിൽ ലിയാണ്ടർ പേസും ഇടംപിടിച്ചിട്ടുണ്ട്. പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ തുടങ്ങിയ ദേശീയ നേതാക്കൾക്കൊപ്പം മിഥുൻ ചക്രവർത്തി, കങ്കണ റണാവത്ത് എന്നിവരോടൊപ്പമാണ് പേസും വോട്ടർമാരെ കാണാൻ എത്തുന്നത്. ജനപ്രിയ വ്യക്തിത്വങ്ങളെ രാഷ്ട്രീയ നേതൃത്വവുമായി കൂട്ടിയിണക്കി സംസ്ഥാനത്ത് സ്വാധീനം വർദ്ധിപ്പിക്കുക എന്ന ബിജെപി തന്ത്രത്തിന്റെ ഭാഗമായാണ് താരത്തിന്റെ ഈ റോൾ.
പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള ഇന്ത്യയുടെ കഴിഞ്ഞ പത്ത് വർഷത്തെ മാറ്റങ്ങളെ പേസ് പ്രകീർത്തിച്ചു. ബംഗാളിൽ ജനിച്ച താൻ ഒരു ഒളിമ്പ്യൻ കുടുംബത്തിൽ നിന്നാണ് വരുന്നതെന്നും കായികരംഗത്തിന് രാഷ്ട്രനിർമ്മാണത്തിൽ വലിയ പങ്കുണ്ടെന്ന് വിശ്വസിക്കുന്നതായും അദ്ദേഹം പറഞ്ഞു. ബംഗാളിന് ഇതിലും മികച്ച ഭരണം അർഹതയുണ്ടെന്നും യുവാക്കളുടെ വികസനത്തിനും കായിക മേഖലയ്ക്കും മുൻഗണന നൽകിക്കൊണ്ട് ഇന്ത്യയുടെ വളർച്ചയിൽ പങ്കാളിയാകാൻ താൻ ആഗ്രഹിക്കുന്നുവെന്നും താരം കൂട്ടിച്ചേർത്തു. ഏപ്രിൽ 9-ന് നടക്കുന്ന ബംഗാൾ തെരഞ്ഞെടുപ്പിൽ പേസിന്റെ സാന്നിധ്യം ബിജെപിക്ക് കരുത്താകുമെന്നാണ് വിലയിരുത്തൽ.
