ഹരിയാന : പാചക വാതക സിലിണ്ടർ പൊട്ടിത്തെറിച്ച് ഏഴു പേർക്ക് പരിക്ക്. പരിക്കേറ്റവരിൽ അഞ്ച് പേർ കുട്ടികളാണ് . ഹരിയാനയിലെ റോഹ്തക്കിലാണ് സിലിണ്ടർ പൊട്ടിത്തെറിച്ചത്. ഇവിടുത്തെ ഏക്താ കോളനിയിലാണ് സംഭവം. അപകടത്തിൽ ഇരുനില വീടും തകർന്നു.
പരിക്കേറ്റ എല്ലാവരെയും പിജിഐ ആശുപത്രിയിൽ പ്രവേശിപ്പിച്ചു, സ്ത്രീയുടെ നില ഗുരുതരമാണെന്നാണ് റിപ്പോർട്ട്. രാവിലെ 6.45 ഓടെ വിശാലിന്റെ ഭാര്യ അനുരാധ വീടിന്റെ അടുക്കളയിൽ ചായ ഉണ്ടാക്കുന്നതിനിടെയാണ് സംഭവം.
പെട്ടെന്ന് സിലിണ്ടർ പൊട്ടിത്തെറിച്ച് വിശാലിനും ഭാര്യയ്ക്കും കുട്ടികൾക്കും പരിക്കേറ്റു. സ്ഫോടനത്തിന്റെ ആഘാതത്തിൽ സമീപത്തെ വീടുകളിലും വിള്ളലുണ്ടായി. ഉടൻ തന്നെ ശിവാജി കോളനി പോലീസും അഗ്‌നിശമന സേനയും സ്ഥലത്തെത്തി പരിക്കേറ്റവരെ ആശുപത്രിയിലേക്ക് മാറ്റി.
വീട്ടിൽ സിലിണ്ടർ പൊട്ടിത്തെറിച്ച് ഏഴ് പേർക്ക് പരിക്കേറ്റിട്ടുണ്ടെന്നും അവർ പിജിഐയിൽ ചികിത്സയിലാണെന്നും എസ്എച്ച്ഒ ഷംഷേർ സിംഗ് പറഞ്ഞു.
