14 വര്ഷങ്ങള്ക്ക് മുന്പ് ഉണ്ടായ മുംബൈ ഭീകരാക്രമണത്തില് രാജ്യത്തിനായി ജീവത്യാഗം മേജര് സന്ദീപ് ഉണ്ണികൃഷ്ണന്റെ ജീവിത കഥ പറയുന്ന ‘മേജര്’ എന്ന ചിത്രത്തിന്റെ ട്രെയിലര് പുറത്തിറങ്ങി. അദിവി ശേഷ് നായകനായെത്തുന്ന ചിത്രം 2022 ജൂണ് 3ന് തിയേറ്ററുകളില് എത്തും. ഈ ചിത്രം പ്രഖ്യാപന വേളയില് തന്നെ ഏറെ ശ്രദ്ധിക്കപ്പെട്ടിരുന്നു. ചിത്രത്തിൽ അദിവി ശേഷ് ആണ് സന്ദീപ് ഉണ്ണികൃഷ്ണന്റെ കഥാപാത്രത്തെ അവതരിപ്പിക്കുന്നത്. ശശി കിരണ് ടിക്കയാണ് ചിത്രത്തിന്റെ സംവിധാനം. നടന് മഹേഷ് ബാബുവിന്റെ ഉടമസ്ഥതയിലുള്ള ജി മഹേഷ് ബാബു എന്റര്ടെയ്ന്മെന്റ്സും സോണി പിക്ചേഴ്സ് ഇന്റര്നാഷണല് പ്രൊഡക്ഷന്സും ചേര്ന്നാണ് നിര്മാണം.
2008ലെ ഭീകരാക്രമണത്തിനിടെ 14 സിവിലിയന്മാരെ രക്ഷിച്ച എന്.എസ്.ജി കമാന്ഡോയാണ് മലയാളിയായ മേജര് സന്ദീപ് ഉണ്ണികൃഷ്ണന്. പരിക്ക് പറ്റിയ സൈനികനെ രക്ഷിക്കുന്നതിനിടെയായിരുന്നു അദ്ദേഹം ഭീകരരുടെ വെടിയേറ്റു മരിക്കുന്നത്. സന്ദീപിന്റെ ധീരതക്ക് മരണാനന്തര ബഹുമതിയായി രാജ്യം അശോക ചക്ര നല്കി ആദരിച്ചിരുന്നു.
അതേസമയം ഹിന്ദിയിലും തെലുങ്കിലും മലയാളത്തിലുമായി ഒരുങ്ങുന്ന ചിത്രത്തില് ശോഭിത ധൂലിപാല, സെയ് മഞ്ജരേക്കര്, പ്രകാശ് രാജ്, രേവതി എന്നിവര് പ്രധാന കഥാപാത്രങ്ങളെ അവതരിപ്പിക്കുന്നു. 26 /11 മുംബൈ ആക്രമണത്തില് ബന്ദിയാക്കപ്പെട്ട ഒരു എന്ആര്ഐയുടെ റോളില് ആണ് സായി മഞ്ചരേക്കര് എത്തുന്നത്. അക്രമണത്തില് പെട്ടുപോയ കഥാപാത്രമായാണ് ശോഭിത എത്തുന്നത്. പിആര്ഒ: ആതിര ദില്ജിത്