കോവിഡ് എന്ന വലിയ മഹാമാരിയുടെ പ്രതിസന്ധികൾ കടന്ന് സിനിമ ലോകം വീണ്ടും ഉയർത്തെഴുനേൽക്കുന്നു. നിരവധി മലയാള സിനിമകൾ ഷൂട്ടിങ്ങിനായി ദുബായിലേക്ക് പോകാനൊരുങ്ങുന്ന വാർത്തകളാണ് ഇപ്പോൾ എത്തുന്നത്. മമ്മൂട്ടി(Mammootty) മോഹൻലാൽ(Mohanlal) തുടങ്ങി മലയാളത്തിലെ ഒട്ടു മിക്ക മുൻനിര താരങ്ങൾക്കും യു.എ.ഇ ഗവൺമെന്റ് പത്ത് വർഷത്തെ ഗോൾഡൻ വിസ സമ്മാനിച്ചിരുന്നു.
ഇതിന് പിന്നാലെ മലയാള സിനിമാ ചിത്രീകരണങ്ങൾക്ക് പുത്തൻ പാക്കേജുകൾ പ്രഖ്യാപിക്കുകയും ചെയ്തു. ഇതോടെയാണ് കൂടുതൽ മലയാള സിനിമകൾ ദുബായിൽ ചിത്രീകരിക്കാനൊരുങ്ങുന്നത്. മംമ്‌താ മോഹൻദാസിനെയും സൗബിൻ ഷാഹിറിനെയും നായികാ നായകന്മാരാക്കി ലാൽജോസ് സംവിധാനം ചെയ്യുന്ന ‘മ്യാവൂ’, നവാഗതനായ ജോണി കുര്യാക്കോസ് സംവിധാനം ചെയ്യുന്ന ചിത്രമായ മെയ്‌ഡ് ഇൻ കാരവൻ എന്ന ആൻസൺ പോൾ – അന്നു ആന്റണി എന്നീ ചിത്രം എന്നിവയാണ് ദുബായിൽ ഒടുവിൽ പൂർത്തീകരിച്ചത്.
അതേസമയം ഈ മാസം മൂന്ന് പുതിയ ചിത്രങ്ങളുടെ ചിത്രീകരണമാണ് ദുബായിൽ തുടങ്ങുന്നത്. അനു സിതാര കേന്ദ്ര കഥാപാത്രത്തെ അവതരിപ്പിക്കുന്ന പുതിയ ചിത്രത്തിന്റെ ഷൂട്ടിംഗ് ഇന്ന് ദുബായിൽ തുടങ്ങും. സുഡാനി ഫ്രം നൈജീരിയയുടെ സംവിധായകൻ സക്കറിയ മുഹമ്മദ് ആണ് ചിത്രം ഒരുക്കുന്നത്. സുരാജ് വെഞ്ഞാറമൂടിനെ നായകനാക്കി ബാഷ് മുഹമ്മദ് കഥയെഴുതി സംവിധാനം ചെയ്യുന്ന പുതിയ ചിത്രത്തിന്റെ ഷൂട്ടിംഗ് നാളെ ദുബായിൽ തുടങ്ങും. ഈ ചിത്രത്തിൽ സിദ്ദിഖ്, ലെന, ഗായത്രി അരുൺ, കുരുതി ഫെയിം സാഗർ സൂര്യ എന്നിവരും പ്രധാന വേഷങ്ങളിൽ വരുന്നുണ്ട്. ഇങ്ങനെ നിരവധി ചിത്രങ്ങളാണ് ഒരുങ്ങുന്നത് എന്ന റിപ്പോർട്ടുകളാണ് ഇപ്പോൾ പുറത്ത് വരുന്നത്.
