കൊൽക്കത്ത: പശ്ചിമ ബംഗാളിലെ ജനങ്ങൾക്ക് വലിയ ദീപാവലി/പെരുന്നാൾ സമ്മാനവുമായി പുതിയ ബിജെപി സർക്കാർ. സംസ്ഥാന സർക്കാർ നടത്തുന്ന സബ്‌സിഡി കാന്റീനുകളിലൂടെ വെറും 5 രൂപയ്ക്ക് മത്സ്യവും ചോറും അടങ്ങുന്ന ഊണ് ലഭ്യമാക്കുമെന്ന് മുഖ്യമന്ത്രി സുവേന്ദു അധികാരി പ്രഖ്യാപിച്ചു. കല്യാണിയിൽ നടന്ന ഭരണതല അവലോകന യോഗത്തിലാണ് മുഖ്യമന്ത്രി ഈ നിർണായക തീരുമാനം അറിയിച്ചത്. സംസ്ഥാനത്തുടനീളം പ്രവർത്തിക്കുന്ന 400 പ്രത്യേക സർക്കാർ കാന്റീനുകളിലൂടെയായിരിക്കും പുതിയ പദ്ധതി നടപ്പിലാക്കുക. ബംഗാളി സ്വത്വത്തിന്റെ ഭാഗമായ ‘മത്സ്യം’ കൂടി കുറഞ്ഞ വിലയിൽ ലഭ്യമാക്കുന്നതോടെ സാധാരണക്കാർക്ക് ഇത് വലിയ ആശ്വാസമാകും.
അടുത്തിടെ നടന്ന നിയമസഭാ തിരഞ്ഞെടുപ്പിൽ ശക്തമായ രാഷ്ട്രീയ പ്രചാരണങ്ങൾക്കും വാദപ്രതിവാദങ്ങൾക്കും വഴിവെച്ച വിഷയമായിരുന്നു ഇത്. ബിജെപി അധികാരത്തിൽ വന്നാൽ ബംഗാളികളുടെ പ്രധാന ഭക്ഷണമായ മത്സ്യം, ഇറച്ചി, മുട്ട എന്നിവ നിരോധിക്കുമെന്ന് തൃണമൂൽ കോൺഗ്രസ് വ്യാപകമായി പ്രചരിപ്പിച്ചിരുന്നു. ‘മത്സ്യവും ചോറും കഴിച്ചാണ് ബംഗാൾ ജീവിക്കുന്നത്. ജനങ്ങളോട് മത്സ്യമോ ഇറച്ചിയോ മുട്ടയോ കഴിക്കരുതെന്ന് പറയാൻ നിങ്ങൾക്കാരാണ് അധികാരം തന്നത്?’ എന്ന് പൊതുയോഗങ്ങളിൽ ടിഎംസി അധ്യക്ഷ മമത ബാനർജി കടുത്ത ഭാഷയിൽ ചോദ്യങ്ങൾ ഉയർത്തിയിരുന്നു. എന്നാൽ പ്രതിപക്ഷത്തിന്റെ ഈ ആരോപണങ്ങളെ പൂർണ്ണമായും തള്ളിക്കൊണ്ടാണ് പുതിയ ബിജെപി സർക്കാർ ഇപ്പോൾ രംഗത്തെത്തിയിരിക്കുന്നത്.
തിരഞ്ഞെടുപ്പ് പ്രചാരണ വേളയിൽ തന്നെ ബിജെപി നേതാക്കൾ ഈ ആരോപണങ്ങൾ നിഷേധിച്ചിരുന്നു. കേന്ദ്ര നേതാവ് അനുരാഗ് താക്കൂർ ഉൾപ്പെടെയുള്ളവർ ബംഗാളിലെ പ്രചാരണത്തിനിടയിൽ പരസ്യമായി ‘മാച്ച്-ഭാത്’ (മത്സ്യവും ചോറും) വിരുന്നുകളിൽ പങ്കെടുക്കുകയും റാലികളിൽ മത്സ്യം കൈയിലേന്തി ബംഗാളി സംസ്‌കാരത്തോടുള്ള ആഭിമുഖ്യം പ്രകടിപ്പിക്കുകയും ചെയ്തിരുന്നു. ജനങ്ങൾക്കിടയിൽ ഭയവും ആശയക്കുഴപ്പവും പരത്താനാണ് മമത ബാനർജി ശ്രമിക്കുന്നതെന്നും, ബിജെപിയോ എൻഡിഎയോ ഭരിക്കുന്ന സംസ്ഥാനങ്ങളിൽ ആരുടെയും ഭക്ഷണത്തിനോ ആരാധനയ്ക്കോ യാതൊരു നിയന്ത്രണവുമില്ലെന്നും നേതാക്കൾ അന്ന് വ്യക്തമാക്കിയിരുന്നു. അധികാരം ലഭിച്ചതോടെ തങ്ങൾ നൽകിയ ഉറപ്പ് പാലിക്കുകയാണ് ബിജെപി സർക്കാർ പുതിയ പ്രഖ്യാപനത്തിലൂടെ ചെയ്യുന്നത്.
പശ്ചിമ ബംഗാളിൽ പാവപ്പെട്ടവർക്ക് കുറഞ്ഞ നിരക്കിൽ ഭക്ഷണം നൽകുന്ന ഈ കാന്റീൻ സംവിധാനം ജനങ്ങൾക്കിടയിൽ അതീവ ജനപ്രിയമാണ്. 2021 ഫെബ്രുവരിയിൽ അന്നത്തെ മുഖ്യമന്ത്രി മമത ബാനർജിയാണ് ‘മാ’ (Maa) കാന്റീൻ എന്ന പേരിൽ ഈ പദ്ധതിക്ക് തുടക്കം കുറിച്ചത്. ഉച്ചയ്ക്ക് 12:30 മുതൽ വൈകുന്നേരം 3:00 മണി വരെ പ്രവർത്തിക്കുന്ന ഈ കാന്റീനുകളിൽ ഇതുവരെ 5 രൂപയ്ക്ക് ചോറ്, പരിപ്പ്, കറി, മുട്ടക്കറി എന്നിവയായിരുന്നു നൽകിയിരുന്നത്. അന്ന് പ്രതിപക്ഷത്തിരുന്ന ബിജെപി ഇതിനെ രാഷ്ട്രീയ ഗിമ്മിക്ക് എന്ന് വിശേഷിപ്പിച്ചിരുന്നെങ്കിലും, 2026-ൽ ബിജെപി സർക്കാർ അധികാരമേറ്റെടുത്തതിന് പിന്നാലെ ഈ ജനക്ഷേമ പദ്ധതി നിർത്തലാക്കാതെ, കൂടുതൽ വിപുലപ്പെടുത്തി ജനങ്ങളിലേക്ക് എത്തിക്കാനാണ് മുഖ്യമന്ത്രി സുവേന്ദു അധികാരി തീരുമാനിച്ചിരിക്കുന്നത്.
