കേരളത്തിലെ വൈദ്യശാസ്ത്ര ചരിത്രത്തിൽ തങ്കലിപികളാൽ എഴുതപ്പെട്ട ഒരു ദൗത്യത്തിന്റെ ഭാഗമായിരുന്ന മാത്യു അച്ചാടൻ (57) അന്തരിച്ചു. 2015-ൽ കേരളത്തിൽ ആദ്യമായി എയർ ആംബുലൻസ് വഴി ഹൃദയം എത്തിച്ച് നടത്തിയ ഹൃദയം മാറ്റിവെക്കൽ ശസ്ത്രക്രിയയ്ക്ക് വിധേയനായ വ്യക്തിയായിരുന്നു അദ്ദേഹം. ശാരീരിക അസ്വസ്ഥതകളെത്തുടർന്ന് ചികിത്സയിലിരിക്കെയാണ് മരണം.
മാത്യുവിന്റെ ജീവിതം, വൈദ്യശാസ്ത്രം, ഭരണകൂടം, സമൂഹം എന്നിവ കൈകോർത്തപ്പോൾ സാധ്യമായ ഒരു അത്ഭുതത്തിന്റെ കഥ കൂടിയാണ്. അദ്ദേഹത്തിന്റെ വിടവാങ്ങലിന്റെ പശ്ചാത്തലത്തിൽ ആ ചരിത്രനിമിഷത്തെ വീണ്ടും ഓർത്തെടുക്കാം.
‘ഡൈലേറ്റഡ് കാർഡിയോമയോപ്പതി’ എന്ന രോഗാവസ്ഥയെത്തുടർന്ന് ഹൃദയത്തിന്റെ പ്രവർത്തനം നിലച്ച അവസ്ഥയിലായിരുന്നു മാത്യു. ലിസി ആശുപത്രിയിൽ ചികിത്സയിലായിരുന്ന അദ്ദേഹത്തിന് ഹൃദയം മാറ്റിവെക്കുകയല്ലാതെ മറ്റൊരു മാർഗവുമില്ലായിരുന്നു. ഈ സമയത്താണ് തിരുവനന്തപുരത്ത് മസ്തിഷ്കാഘാതം മൂലം മരിച്ച നീലകണ്ഠ ശർമ എന്ന യുവ അഭിഭാഷകന്റെ ഹൃദയം ലഭ്യമാണെന്ന വിവരം ലഭിക്കുന്നത്.
തിരുവനന്തപുരത്തുനിന്ന് കൊച്ചിയിലേക്ക് റോഡ് മാർഗ്ഗം ഹൃദയം എത്തിക്കാൻ ഏകദേശം നാല് മണിക്കൂറിലധികം സമയം വേണ്ടിവരുമെന്നത് ശസ്ത്രക്രിയയുടെ വിജയത്തെ പ്രതികൂലമായി ബാധിക്കുമെന്ന് ഡോക്ടർമാർ ഭയന്നു. ഈ പ്രതിസന്ധിയാണ് കേരളത്തിലെ ആദ്യത്തെ എയർ ആംബുലൻസ് ദൗത്യത്തിലേക്ക് വഴിതുറന്നത്.
പ്രശസ്ത ഹൃദയശസ്ത്രക്രിയ വിദഗ്ധൻ ഡോ. ജോസ് ചാക്കോ പെരിയപ്പുറത്തിന്റെ നേതൃത്വത്തിൽ നടന്ന ദൗത്യത്തിന് അന്നത്തെ മുഖ്യമന്ത്രി ഉമ്മൻ ചാണ്ടി പൂർണ്ണ പിന്തുണ നൽകി. ഹൈബി ഈഡൻ എം.എൽ.എയുടെ ഇടപെടലിലൂടെ സർക്കാർ തലത്തിൽ ഏകോപനം നടന്നു. തുടർന്ന് നാവികസേനയുടെ സഹകരണത്തോടെ ഡോണിയർ വിമാനം തയ്യാറാക്കി.
ദൗത്യം ഒട്ടും എളുപ്പമായിരുന്നില്ല. തിരുവനന്തപുരം വിമാനത്താവളത്തിൽ നിന്ന് കൊച്ചിയിലേക്ക് വെറും 35 മിനിറ്റ് കൊണ്ടാണ് വിമാനം പറന്നെത്തിയത്. കൊച്ചി വിമാനത്താവളത്തിൽ നിന്ന് ആശുപത്രിയിലേക്ക് ആംബുലൻസിന് തടസ്സമില്ലാതെ എത്താൻ പോലീസ് ‘ഗ്രീൻ കോറിഡോർ’ ഒരുക്കി. ഡോ. പെരിയപ്പുറത്തിന്റെ നേതൃത്വത്തിലുള്ള മെഡിക്കൽ സംഘം അതീവ കൃത്യതയോടെ ശസ്ത്രക്രിയ പൂർത്തിയാക്കി മാത്യുവിന് പുതിയൊരു ജീവിതം സമ്മാനിച്ചു.
ചികിത്സാ ചെലവുകൾക്ക് ബുദ്ധിമുട്ടിയ മാത്യുവിനായി പരിയാരത്തെ നാട്ടുകാർ വലിയ പിന്തുണയാണ് നൽകിയത്. പഞ്ചായത്ത് മെമ്പർ ഡാലി വർഗീസ്, പി.വി. ഷിബു എന്നിവരുടെ നേതൃത്വത്തിൽ രൂപീകരിച്ച സഹായ സമിതിയിലൂടെ ലക്ഷങ്ങൾ സമാഹരിച്ചു. എയർ ആംബുലൻസിന്റെ ചെലവ് സർക്കാർ വഹിക്കുമെന്ന ഉമ്മൻ ചാണ്ടിയുടെ പ്രഖ്യാപനം വലിയ ആശ്വാസമാണ് കുടുംബത്തിന് നൽകിയത്.
ഹൃദയം മാറ്റിവെക്കൽ ശസ്ത്രക്രിയയ്ക്ക് ശേഷം മാത്യു അച്ചാടൻ തന്റെ കുടുംബത്തോടൊപ്പം സന്തോഷകരമായ വർഷങ്ങൾ പിന്നിട്ടു. വൈദ്യശാസ്ത്ര ചരിത്രത്തിൽ വലിയൊരു നാഴികക്കല്ലായ ആ ശസ്ത്രക്രിയയിലൂടെ മാത്യുവിന് ലഭിച്ച ജീവിതം, മനുഷ്യസ്നേഹത്തിന്റെയും കൂട്ടായ പരിശ്രമത്തിന്റെയും അടയാളമായി എന്നും ഓർമ്മിക്കപ്പെടും.
