മോസ്‌കോ/ കീവ് : റഷ്യ-യുക്രെയ്ന്‍ യുദ്ധത്തിന് പരിഹാരം കാണുന്നതിനായി ഇന്ത്യ മുന്നോട്ടുവെച്ച സമഗ്രമായ സമാധാന നിര്‍ദേശത്തിന് നന്ദി അറിയിച്ച് റഷ്യ. മൂന്ന് ഘട്ടങ്ങളുള്ള വെടിനിര്‍ത്തല്‍ പദ്ധതി ഇന്ത്യ സമര്‍പ്പിച്ചെന്ന റിപ്പോര്‍ട്ടുകള്‍ പുറത്തുവന്നതിന് പിന്നാലെയാണ് ക്രെംലിന്റെ പ്രതികരണം. ഇന്ത്യന്‍ സമാധാന പദ്ധതിയെ സ്വാഗതം ചെയ്യുന്നുവെന്നും, വിഷയം പരിഹരിക്കുന്നതില്‍ പ്രായോഗികമായ ഒരു പങ്കുവഹിക്കാന്‍ ഇന്ത്യ മുന്നോട്ടുവന്നതില്‍ സന്തോഷമുണ്ടെന്നും ക്രെംലിന്‍ വക്താവ് ദിമിത്രി പെസ്‌കോവ് ബുധനാഴ്ച വ്യക്തമാക്കി.
റഷ്യയുമായി വെടിനിര്‍ത്തലിനായി സമര്‍പ്പിക്കപ്പെട്ട നാല് പ്രധാന നിര്‍ദേശങ്ങളില്‍ ഏറ്റവും വിശദവും സമഗ്രവുമായത് ഇന്ത്യയുടേതാണെന്ന് യുക്രെയ്ന്‍ വിദേശകാര്യ മന്ത്രി ആന്ദ്രി സിബിഹയും വ്യക്തമാക്കിയിരുന്നു. ഇന്ത്യക്ക് പുറമെ തുര്‍ക്കി, ഈജിപ്ത്, യു.എസ് എന്നീ രാജ്യങ്ങളാണ് മറ്റ് നിര്‍ദേശങ്ങള്‍ സമര്‍പ്പിച്ചിട്ടുള്ളത്. ഊര്‍ജ്ജ നിലയങ്ങള്‍ക്കും കരിങ്കടല്‍ മേഖലയ്ക്കും നേരെയുള്ള ആക്രമണങ്ങള്‍ പൂര്‍ണമായി നിര്‍ത്തിവെച്ചുകൊണ്ടുള്ള വെടിനിര്‍ത്തലിന് തങ്ങള്‍ തയ്യാറാണെന്ന് സിബിഹ അറിയിച്ചു.
കഴിഞ്ഞയാഴ്ച നടന്ന വാല്‍ദായ് ഇന്റര്‍നാഷണല്‍ ഡിസ്‌കഷന്‍ ക്ലബ് യോഗത്തില്‍, സംഘര്‍ഷം അവസാനിപ്പിക്കുന്നതിനായി ഇന്ത്യന്‍ പ്രധാനമന്ത്രി നരേന്ദ്ര മോദിക്ക് മികച്ച ആശയങ്ങളുണ്ടെന്ന് റഷ്യന്‍ പ്രസിഡന്റ് വ്ളാദിമിര്‍ പുടിന്‍ ചൂണ്ടിക്കാണിച്ചിരുന്നു. ഇരുരാജ്യങ്ങളും തമ്മില്‍ ഊഷ്മളമായ ബന്ധമാണുള്ളതെന്നും എല്ലാ കൂടിക്കാഴ്ചകളിലും യുദ്ധം അവസാനിപ്പിക്കേണ്ടതിന്റെ ആവശ്യകത മോദി ഊന്നിപ്പറയാറുണ്ടെന്നും പുടിന്‍ കൂട്ടിച്ചേര്‍ത്തു. അഞ്ചാം വര്‍ഷത്തിലേക്ക് കടന്ന റഷ്യ-യുക്രെയ്ന്‍ യുദ്ധത്തില്‍ പതിനായിരക്കണക്കിന് ആളുകള്‍ക്ക് ജീവന്‍ നഷ്ടപ്പെടുകയും ലക്ഷക്കണക്കിന് ജനങ്ങള്‍ അഭയാര്‍ഥികളാകുകയും ചെയ്തിട്ടുണ്ട്.
