ദില്ലി :പരീക്ഷാ നടത്തിപ്പിലെ സുതാര്യത ഉറപ്പാക്കാൻ കർശന നടപടിയുമായി ഭരണകൂടം. സ്വകാര്യ ഏജൻസികൾക്കുള്ള പുറംകരാറുകൾക്കും നിയന്ത്രണം വരുന്നു
നീറ്റ് യു.ജി പരീക്ഷാ ക്രമക്കേടുകളുടെ പശ്ചാത്തലത്തിൽ നാഷണൽ ടെസ്റ്റിങ് ഏജൻസിയിൽ (എൻ.ടി.എ) കേന്ദ്ര സർക്കാർ വലിയ അഴിച്ചുപണി നടത്തി. എൻ.ടി.എ രൂപീകരിച്ചതിന് ശേഷമുള്ള ഏറ്റവും വലിയ അച്ചടക്ക നടപടിയുടെ ഭാഗമായി, ഡെപ്യൂട്ടേഷനിലുണ്ടായിരുന്നവർ ഉൾപ്പെടെ 47 ഉദ്യോഗസ്ഥരെയാണ് ഏജൻസിയിൽ നിന്ന് ഉടനടി പുറത്താക്കിയത്.
പുറത്താക്കപ്പെട്ട ഉദ്യോഗസ്ഥരിൽ ചിലർക്കെതിരെ ഗുരുതരമായ അച്ചടക്ക നടപടികളും തുടരന്വേഷണങ്ങളും ഉണ്ടാകുമെന്നാണ് സൂചന.
പരീക്ഷാ നടത്തിപ്പിലെ സുതാര്യതയും സുരക്ഷയും പൂർണ്ണമായി ഉറപ്പാക്കുന്നതിന്റെ ഭാഗമായി എൻ.ടി.എയുടെ ഘടനയിലും പ്രവർത്തന ശൈലിയിലും കാതലായ മാറ്റങ്ങൾ വരുത്താനാണ് ഭരണകൂടത്തിന്റെ തീരുമാനം. മുൻപ് നിയോഗിച്ച വിദഗ്‌ധസമിതി സമർപ്പിച്ച നിർണ്ണായക ശുപാർശകളുടെ അടിസ്ഥാനത്തിലാണ് ഈ കൂട്ടനടപടി.
ഇതിന്റെ തുടർച്ചയായി കൂടുതൽ സുരക്ഷിതമായ പുതിയ പരീക്ഷാ സംവിധാനം ഒരുക്കാനും കേന്ദ്രം ലക്ഷ്യമിടുന്നുണ്ട്.
ഇതിന്റെ ഭാഗമായി, പരീക്ഷാ കേന്ദ്രങ്ങളുടെ നടത്തിപ്പും സാങ്കേതിക സൗകര്യങ്ങളും സ്വകാര്യ ഏജൻസികൾക്ക് പുറംകരാർ നൽകുന്ന നിലവിലെ രീതിയിൽ വലിയ നിയന്ത്രണങ്ങൾ വരും. ഉത്തരവാദിത്വം വർദ്ധിപ്പിക്കാനും വിവരച്ചോർച്ചയും സാങ്കേതിക പിഴവുകളും പൂർണ്ണമായി ഒഴിവാക്കാനും ഈ പരിഷ്കാരങ്ങൾ സഹായിക്കുമെന്നാണ് വിലയിരുത്തൽ.
നീറ്റ് യു.ജിക്ക് പുറമെ ജെ.ഇ.ഇ മെയിൻ, സി.യു.ഇ.ടി തുടങ്ങി ഇരുപതോളം ദേശീയതല പരീക്ഷകളാണ് എൻ.ടി.എ നടത്തുന്നത്. വരും ദിവസങ്ങളിൽ ഏജൻസിയുടെ മേൽനോട്ടത്തിലും ബോർഡ് ഘടനയിലും കൂടുതൽ നിർണ്ണായക തീരുമാനങ്ങൾ ഉണ്ടായേക്കും.
