പത്തനംതിട്ട: റോഡ് മുറിച്ചു കടക്കുന്നതിനിടെ കെഎസ്ആർടിസി ബസിടിച്ച് വയോധികയ്ക്ക് ദാരുണാന്ത്യം. വെണ്ണിക്കുളം പാരുമണ്ണില്‍ പരേതനായ ജോസഫ് രാജുവിന്റെ ഭാര്യ ലിസി രാജു (75) ആണ് മരിച്ചത്. മലങ്കര കത്തോലിക്കാ സഭയുടെ പട്ടം കതോലിക്കറ്റിലേ കൂരിയ ബിഷപ്പ് ആന്റണി മാര്‍ സില്‍വാനോസിന്റെ സഹോദരിയാണ്. വെണ്ണിക്കുളം കോഴഞ്ചേരി റോഡില്‍ കത്തോലിക്കാ പള്ളിക്ക് സമീപം ഇന്നലെ വൈകുന്നേരമായിരുന്നു അപകടം.
വൈകുന്നേരം 5.45-ന് പള്ളി പടിക്കല്‍ ഓട്ടോ ഇറങ്ങിയ ലിസി റോഡ് മുറിച്ചു കടക്കാന്‍ ശ്രമിക്കവെയാണ് കെഎസ്ആര്‍ടിസി ബസ് ഇടിച്ചത്. റോഡിന്റെ നടുവിലെ വെള്ളവരയ്ക്ക് സമീപമെത്തിയ ലിസി
ബസ് നിര്‍ത്തുമെന്ന് വിചാരിച്ച് മുന്നോട്ടുനീങ്ങി. എന്നാല്‍ മുന്നോട്ടുപാഞ്ഞ ബസ് ലിസിയെ ഇടിക്കുകയായിരുന്നു. ബസിന്റെ അടിയില്‍ വീണുപോയ ലിസിയുടെ ശരീരത്തിലൂടെ ബസിന്റെ ചക്രങ്ങള്‍ കയറിയിറങ്ങി. ഉടന്‍ തന്നെ തിരുവല്ല പുഷ്പഗിരി ആശുപത്രിയില്‍ എത്തിച്ചെങ്കിലും രാത്രി 12 മണിയോടെ മരിച്ചു. സംസ്‌കാരം ഫെബ്രുവരി 21 വെള്ളിയാഴ്ച പകല്‍ 12 മണിക്ക് വെണ്ണിക്കുളം സെന്റ് തോമസ് മലങ്കര കത്തോലിക് പള്ളിയില്‍ നടക്കും. മക്കള്‍ ജോജോ (UK), ജിനു (ഓസ്‌ട്രേലിയ).
അതേസമയം, ആള് റോഡ് മുറിച്ചുകടക്കുന്നത് കണ്ടിട്ടും ബസ് നിര്‍ത്താന്‍ ഡ്രൈവര്‍ ശ്രമിച്ചില്ലെന്ന് നാട്ടുകാര്‍ ആരോപിച്ചു
