സിവില്‍ പോലീസ് ഓഫീസര്‍ റാങ്ക് ലിസ്റ്റിന്റെ കാലാവധി പൂര്‍ത്തിയാകാന്‍ ദിവസങ്ങള്‍ മാത്രം ബാക്കിയായിട്ടും നിയമനം നടത്താതിൽ പ്രതിഷേധിച്ച് സെക്രട്ടറിയേറ്റ് പടിക്കൽ നടത്തുന്ന സമരം കടുപ്പിച്ച് ഉദ്യോഗാര്‍ഥികള്‍. കഴിഞ്ഞ ദിവസം മുട്ടിലിഴഞ്ഞ് പ്രതിഷേധിച്ച ഉദ്യോഗാർത്ഥികൾ ഇന്ന് തല മുണ്ഡനം ചെയ്തും പ്രതീകാത്മക ശവസംസ്‌കാര ചടങ്ങ് നടത്തിയമായിരുന്നു പ്രതിഷേധിച്ചത്.
സിപിഒ റാങ്ക് ലിസ്റ്റ് കാലാവധി അവസാനിക്കാന്‍ 54 ദിവസം മാത്രമാണ് ഇനി ബാക്കിയുള്ളത്. 13,975 പേര്‍ ഉള്‍പ്പെട്ട റാങ്ക് പട്ടികയില്‍നിന്നും ഇതുവരെ നിയമനം ലഭിച്ചത് 3019 പേര്‍ക്ക് മാത്രമാണ്. പട്ടികയിലുള്ള പലർക്കും പ്രായപരിധി കാരണം ഇത് അവസാന അവസരമാണ്. പല പ്രതിബന്ധങ്ങളും തരണം ചെയ്ത് പഠിച്ച് റാങ്ക് ലിസ്റ്റിൽ എത്തിയിട്ടും അർഹിച്ച ജോലി നിഷേധിക്കപ്പെടുമോ എന്ന ആശങ്കയിലാണ് ഉദ്യോഗാർത്ഥികൾ .അതേസമയം ദിവസങ്ങളോളം സെക്രട്ടറിയേറ്റിന് മുന്നില്‍ സമരം നടത്തിയിട്ടും സര്‍ക്കാര്‍ തിരിഞ്ഞുപോലും നോക്കിയില്ലെന്നും പരാതിയുണ്ട്. തങ്ങൾക്ക് നീതി വേണമെന്നും സമരക്കാര്‍ ആവശ്യപ്പെട്ടു.
