ചണ്ഡീഗഡ് : അതിർത്തിയിൽ പാകിസ്ഥാൻ ഡ്രോൺ വെടിവച്ച് വീഴ്ത്തി ബിഎസ്എഫ്. പഞ്ചാബിലെ ഫിറോസ്പൂറലെ ഇന്ത്യാ- പാകിസ്ഥാൻ അതിർത്തിയിലാണ് സംശയാസ്പദമായി കണ്ട ഡ്രോൺ ബിഎസ്എഫ് വെടിവച്ച് വീഴ്ത്തിയത്. ഇന്നലെ രാത്രി 11.25 ഓടെയാണ് സംഭവം നടന്നത്.
136 ബറ്റാലിയനിലെ ബിഎസ്എഫ് ജവാൻമാരെ വിന്യസിച്ചിരിക്കുന്ന സ്ഥലത്ത് നിന്നാണ് സംശയാസ്പദമായി ഡ്രോൺ പറക്കുന്ന ശബ്ദം കേട്ടത്. പിന്നാലെ സേന വെടിയുതിർക്കുകയായിരുന്നു.ഹെക്സ-കോപ്റ്റർ ഡ്രോൺ മോഡലായ ഡിജെഐ മെട്രിസ് 300 ആർടിഎക്സായിരുന്നു പിടിച്ചെടുത്തത്.
പ്രദേശത്ത് നുഴഞ്ഞുകയറ്റം തടയുന്നതിനുള്ള നടപടികൾ അധികൃതർ ആരംഭിച്ചു കഴിഞ്ഞു. ഒപ്പം കൂടുതൽ സേനയെയും വിന്യസിച്ചു. കഴിഞ്ഞ ഒരു മാസത്തിനിടെ പഞ്ചാബ് അതിർത്തിയിൽ സൈന്യം വെടിവെച്ചിട്ട നാലാമത്തെ പാക് ഡ്രോണായിരുന്നു ഇത്.