ദില്ലി: രാജ്യത്ത് പല ഭാഗങ്ങളിലും ഹിന്ദുക്കൾക്ക് എതിരെ വിദ്വേഷ പ്രസംഗങ്ങളും അടിച്ചമർത്തുന്ന തരത്തിലുള്ള നടപടികളും റിപ്പോർട്ട് ചെയ്യപ്പെടുന്നുണ്ട്. ഇതിനെതിരെ ശക്തമായ പ്രതിഷേധവുമായി
ഹിന്ദു സംഘടനകൾ രംഗത്തുവന്നിരിക്കുകയാണ്.തീവ്ര മുസ്ലീം പുരോഹിതർ നടത്തിയ ഹിന്ദു വിരുദ്ധ വിദ്വേഷ പ്രസംഗങ്ങളിൽ (ate Speeches Against Hindus) നടപടി ആവശ്യപ്പെട്ട് ഹൈന്ദവ സംഘടന സുപ്രീംകോടതിയെ സമീപിച്ചിരിക്കുകയാണ് ഇപ്പോൾ.
അടുത്തിടെ ഹരിദ്വാറിൽ നടത്തിയ മതസമ്മേളനങ്ങളിൽ ഉൾപ്പെടെ മുസ്ലീം വിരുദ്ധ പ്രസംഗം നടത്തിയെന്ന് ആരോപിച്ച് സമർപ്പിച്ച പരാതിയിൽ സുപ്രീംകോടതി ഉത്തരാഖണ്ഡ് സർക്കാരിനോടും കേന്ദ്ര സർക്കാരിനോടും വിശദീകരണം ആവശ്യപ്പെട്ടിരുന്നു. ഇതേ രീതിയിലുളള സംരക്ഷണം ഹൈന്ദവ സമൂഹത്തിനും വേണമെന്ന് ആവശ്യപ്പെട്ടാണ് ഹിന്ദു ഫ്രണ്ട് ഫോർ ജസ്റ്റീസ് സുപ്രീംകോടതിയെ സമീപിച്ചത്. തീവ്ര മുസ്ലീം പുരോഹിതർ നടത്തിയ വിദ്വേഷ പ്രസംഗങ്ങളുടെ പട്ടികയും വീഡിയോ ക്ലിപ്പിംഗുകളും വാർത്താ ക്ലിപ്പിംഗുകളും അപേക്ഷയ്‌ക്ക് ഒപ്പം നൽകിയിട്ടുണ്ട്.
ഇവരിൽ ചിലർ ഹിന്ദു വംശഹത്യയ്‌ക്ക് പോലും ആഹ്വാനം ചെയ്തിട്ടുണ്ടെന്നും ഇവർക്കെതിരെ യാതൊരു നടപടികളും എടുത്തിട്ടില്ലെന്നും അപേക്ഷയിൽ പറയുന്നു. നിയമത്തിന് മുൻപിൽ ഇന്ത്യയിലെ എല്ലാ പൗരൻമാരും തുല്യരാണ്. അതുകൊണ്ടു തന്നെ വിദ്വേഷ പ്രസംഗങ്ങൾ വിശകലനം ചെയ്യുമ്പോൾ ന്യൂനപക്ഷമെന്നോ ഭൂരിപക്ഷമെന്നോ പരിഗണനയും ഇളവുകളും നൽകാനാകില്ലെന്നും അഭിഭാഷകനായ വിഷ്ണു ശങ്കർ ജെയിൻ മുഖേന നൽകിയ അപേക്ഷയിൽ പറയുന്നു. സമൂഹത്തിൽ സാമുദായിക വിദ്വേഷം വളർത്താനും കലാപത്തിന് പ്രേരണ നൽകാനും ലക്ഷ്യമിട്ടുളള പ്രസംഗങ്ങളാണ് പല തീവ്ര ചിന്താഗതിക്കാരായ മുസ്ലീം പുരോഹിതരും നടത്തുന്നതെന്ന് ഹിന്ദു ഫ്രണ്ട് ഫോർ ജസ്റ്റീസ് നേതാക്കൾ ചൂണ്ടിക്കാട്ടി.
