തിരുവനന്തപുരം: നാളെ പ്രധാനമന്ത്രി നരേന്ദ്ര മോദി കേരളവും തമിഴ്നാടും സന്ദർശിക്കുന്നതിന്റെ ഭാഗമായി തിരുവനന്തപുരം നഗരത്തിൽ കടുത്ത ഗതാഗത നിയന്ത്രണങ്ങൾ ഏർപ്പെടുത്തി. എഐഎഡിഎംകെ– എൻഡിഎ സഖ്യത്തിന്റെ തിരഞ്ഞെടുപ്പ് പ്രചാരണത്തിനായി നാഗർകോവിലിലെത്തുന്ന പ്രധാനമന്ത്രി, തിരുവനന്തപുരം വിമാനത്താവളം വഴിയാണ് യാത്ര ചെയ്യുന്നത്. സുരക്ഷാ മുൻകരുതലുകളുടെ ഭാഗമായി നാളെ ഉച്ചയ്ക്ക് 11.30 മുതൽ രാത്രി 7 മണി വരെ തലസ്ഥാനത്തെ പ്രധാന റോഡുകളിൽ ഗതാഗത ക്രമീകരണവും പാർക്കിങ് നിരോധനവും ഉണ്ടായിരിക്കും.
വിമാനത്താവളം മുതൽ പള്ളിച്ചൽ വരെയുള്ള പ്രധാന പാതകളിലും അനുബന്ധ റോഡുകളിലുമാണ് നിയന്ത്രണം. ഡൊമസ്റ്റിക് എയർപോർട്ട് – ചാക്ക – ബേക്കറി ജംഗ്ഷൻ, തമ്പാനൂർ ഫ്ലൈ ഓവർ, കിള്ളിപ്പാലം, പള്ളിച്ചൽ റോഡ് എന്നിവിടങ്ങളിൽ വാഹനങ്ങൾ പാർക്ക് ചെയ്യാൻ അനുവദിക്കില്ല. നിയമലംഘനം നടത്തുന്ന വാഹനങ്ങളെ റിക്കവറി വാഹനം ഉപയോഗിച്ച് നീക്കം ചെയ്യുമെന്നും കർശന നിയമനടപടികൾ സ്വീകരിക്കുമെന്നും സിറ്റി പോലീസ് അറിയിച്ചു.
വിമാനത്താവളത്തിലേക്കും റെയിൽവേ സ്റ്റേഷനിലേക്കും പോകുന്ന യാത്രക്കാർക്ക് നിയന്ത്രണങ്ങൾ മൂലം തടസ്സമുണ്ടാകാൻ സാധ്യതയുണ്ട്. ഉച്ചയ്ക്ക് 2.00 മുതൽ 4.00 വരെയും വൈകുന്നേരം 6.00 മുതൽ 7.00 വരെയും ശംഖുമുഖം ഭാഗത്തുനിന്ന് ഡൊമസ്റ്റിക് എയർപോർട്ടിലേക്ക് ഗതാഗതം അനുവദിക്കില്ല. ഈ സമയത്ത് എയർപോർട്ടിലേക്ക് പോകുന്നവർ ചാക്ക – ഈഞ്ചക്കൽ – കല്ലുംമൂട് – വലിയതുറ വഴി പോകേണ്ടതാണ്. യാത്രക്കാർ തടസ്സങ്ങൾ ഒഴിവാക്കാൻ നേരത്തെ തന്നെ യാത്രകൾ ക്രമീകരിക്കണമെന്ന് പോലീസ് നിർദ്ദേശിച്ചു.
പ്രധാന റോഡുകളിലേക്ക് പ്രവേശിക്കുന്ന ഇടറോഡുകളിലും പ്രധാനമന്ത്രി കടന്നുപോകുന്ന സമയത്ത് നിയന്ത്രണമുണ്ടാകും. ശംഖുമുഖം, ചാക്ക, വഴുതക്കാട്, പൂജപ്പുര, തമ്പാനൂർ, നേമം തുടങ്ങി വിവിധ ഭാഗങ്ങളിൽ ഗതാഗതം വഴിതിരിച്ചുവിടും. കൂടുതൽ വിവരങ്ങൾക്കും സഹായത്തിനുമായി സിറ്റി പൊലീസ് ഹെൽപ്പ് ലൈൻ നമ്പരുകളായ 0471 2558731, 9497930055 എന്നിവയിൽ ബന്ധപ്പെടാവുന്നതാണ്.
