പാര്‍ട്ടി അനാഥമാണെന്നുള്ള പൊതുജനങ്ങള്‍ക്കിടയിലെ ധാരണ മാറ്റാന്‍ നേതൃത്വപരമായ പ്രശ്നങ്ങള്‍ പരിഹരിക്കുന്നതിന് പ്രഥമപരിഗണന നല്‍കണമെന്ന് കോണ്‍ഗ്രസ് നേതാവും തിരുവനന്തപുരം എംപിയുമായ ശശി തരൂര്‍. ദീര്‍ഘകാല പ്രസിഡന്‍റിനെ തെരഞ്ഞെടുക്കുന്നതുമായി ബന്ധപ്പെട്ട അനിശ്ചിതത്വം നീക്കുക എന്നതാണ് പാര്‍ട്ടി പുനരുജ്ജീവിനത്തിനു പ്രധാനമെന്നും തരൂര്‍ പറഞ്ഞു.
രാഹുല്‍ ഗാന്ധി കോണ്‍ഗ്രസ് അധ്യക്ഷനായി മടങ്ങിവരാന്‍ ആഗ്രഹിക്കുന്നെങ്കില്‍ അദ്ദേഹം തന്നെയാണ് അക്കാര്യം അറിയിക്കേണ്ടത്. എന്നാല്‍ അദ്ദേഹം തന്‍റെ നിലപാടില്‍നിന്ന് മാറുന്നില്ലായെങ്കില്‍ പാര്‍ട്ടിക്ക് സജീവമായ മുഴുവന്‍ സമയ നേതൃത്വത്തെ കണ്ടെത്തേണ്ടതുണ്ട്. രാജ്യം പ്രതീക്ഷിക്കുന്ന രീതിയില്‍ ഇതോടെ പാര്‍ട്ടിക്ക് മുന്നോട്ടുപോകാന്‍ കഴിയുമെന്നും ഒരു ദേശീയ മാധ്യമത്തിന് നല്‍കിയ അഭിമുഖത്തില്‍ പറഞ്ഞു.
സോണിയ ഗാന്ധിയിലൂടെ കോണ്‍ഗ്രസ് വര്‍ക്കിംഗ് കമ്മിറ്റി ഇടക്കാല പരിഹാരം കണ്ടെത്തി. രണ്ടു വര്‍ഷം മുമ്പ് സ്ഥാനമുപേക്ഷിച്ച പ്രസിഡന്‍റുമായി പാര്‍ട്ടിക്ക് അനിശ്ചിതമായി മുന്നോട്ടുപോകാന്‍ സാധിക്കില്ല. ഇത് സോണിയ ഗാന്ധിയോടും വോട്ടര്‍മാരോടും ചെയ്യുന്ന അനീതിയാകുമെന്നും തരൂര്‍ പറയുന്നു.
