തിരുവനന്തപുരം: സംസ്ഥാനത്ത് സ്വർണ്ണവിലയിൽ വൻ കുതിച്ചുചാട്ടം. ഒരു പവൻ സ്വർണ്ണത്തിന്
ഇന്ന് 400 രൂപയാണ് ഒറ്റയടിക്ക് വർദ്ധിച്ചത്. ഇന്ന് ഒരു പവൻ സ്വർണ്ണത്തിന്റെ വിപണി വില 45,600 രൂപയാണ്. ഇതോടെ, സംസ്ഥാനത്ത് ഇന്ന് സ്വർണ്ണവില സർവകാല റെക്കോർഡിൽ എത്തിയിരിക്കുകയാണ്.
ഒരു ഗ്രാം സ്വർണ്ണത്തിന് 5,700 രൂപ നിരക്കിലാണ് വ്യാപാരം നടക്കുന്നത്. തുടർച്ചയായ രണ്ടാം ദിവസമാണ് സ്വർണ്ണവില ഉയർന്നത്. ഇന്നലെ 640 രൂപയുടെ വർദ്ധനവാണ് രേഖപ്പെടുത്തിയത്.
അന്താരാഷ്ട്ര വിപണിയിൽ ഒരു ട്രോയ് ഔൺസിന് 2,044 ഡോളറിലേക്കാണ് വില ഉയർന്നത്. ഇതിനു മുൻപ് ഏപ്രിൽ 14നാണ് റെക്കോർഡ് നിലവാരമായ 45,320 രൂപ സ്വർണ്ണത്തിന് രേഖപ്പെടുത്തിയത്. പിന്നീടുള്ള ദിവസങ്ങളിൽ സ്വർണ്ണവില 44,560 രൂപയിലേയ്ക്ക് താഴുകയും ചെയ്തിട്ടുണ്ട്. ബാങ്കിംഗ് മേഖലയിലെ പ്രതിസന്ധിയും മാന്ദ്യഭീതിയും വീണ്ടും തലപൊക്കിയതോടെ സമ്പദ്ഘടനയ്ക്ക് തിരിച്ചടിയുണ്ടായേക്കുമെന്ന ആശങ്കയാണ് സ്വർണ്ണവിലയെ സ്വാധീനിച്ചത്.
