തിരുവനന്തപുരം: ശബരിമല തീര്ത്ഥാടനവുമായി ബന്ധപ്പെട്ട് തീര്ത്ഥാടകര്ക്ക് അടിയന്തര വൈദ്യ സഹായം ഒരുക്കാന് കനിവ് 108ന്റെ റാപ്പിഡ് ആക്ഷന് മെഡിക്കല് യൂണിറ്റുകള് കൂടി വിന്യസിച്ചതായി മന്ത്രി വീണാ ജോര്ജ്. ആരോഗ്യ വകുപ്പിൻ്റെയും കനിവ് 108ന്റേയും ആംബുലന്സുകള്ക്ക് പുറമേയാണ് ഈ യൂണിറ്റുകള് കൂടി സജ്ജമാക്കിയിരിക്കുന്നത്. സുസജ്ജമായ ആശുപത്രികള്ക്ക് പുറമേ പമ്പ മുതല് സന്നിധാനം വരെയും കാനനപാതയിലുമായി ആകെ 19 എമര്ജന്സി മെഡിക്കല് സെൻ്ററുകള്, ഓക്സിജന് പാര്ലറുകള് എന്നിവയും സജ്ജമാക്കി. ഇടുങ്ങിയ പാതകളില് സഞ്ചരിക്കാന് കഴിയുന്ന ബൈക്ക് ഫീഡര് ആംബുലന്സ്, ദുര്ഘട പാതകളിലൂടെ സഞ്ചരിക്കാന് കഴിയുന്ന 4×4 റെസ്ക്യു വാന്, ഐ.സി.യു ആംബുലന്സ് എന്നിവയാണ് ശബരിമലയ്ക്കായി സജ്ജമാക്കിയത്.
തീര്ത്ഥാടകര്ക്ക് വൈദ്യസഹായം വേണ്ട സാഹചര്യങ്ങളില് 108 എന്ന ടോള് ഫ്രീ നമ്പറിലേക്ക് ബന്ധപ്പെട്ടാല് ഈ വാഹനങ്ങളുടെ സേവനം ലഭ്യമാകും. ഒരു രോഗിയെ കിടത്തികൊണ്ട് പോകാന് കഴിയുന്ന തരത്തില് സജ്ജമാക്കിയ സൈഡ് കാറോടു കൂടിയതാണ് ബൈക്ക് ഫീഡര് ആംബുലന്സ്. രോഗികളെ പരിചരിക്കുന്നതിന് പ്രത്യേക പരിശീലനം ലഭിച്ച ഒരു എമര്ജന്സി മെഡിക്കല് ടെക്നീഷ്യന് ആയിരിക്കും ഈ വാഹനം നിയന്ത്രിക്കുന്നത്.
രോഗികളെ പരിചരിക്കുന്നതിന് പ്രത്യേക പരിശീലനം ലഭിച്ച ഒരു എമര്ജന്സി മെഡിക്കല് ടെക്നീഷ്യന്റെ സേവനം ഈ വാഹനത്തില് ഉണ്ടായിരിക്കും. പമ്പയില് നിന്ന് ഗുരുതര ആരോഗ്യ പ്രശ്നങ്ങള് ഉള്ളവരെ വിദഗ്ധ ചികിത്സയ്ക്കായി മറ്റ് സ്ഥലങ്ങളിലേക്ക് മാറ്റുന്നതിനായാണ് ഐ.സി.യു ആംബുലന്സ് സജ്ജമാക്കിയിരിക്കുന്നത്.
