ആലപ്പുഴ : ഉസ്ബെക്കിസ്ഥാനിലെ ബുഖാറ സ്റ്റേറ്റ് മെഡിക്കൽ യൂണിവേഴ്സിറ്റിയിലെ ഒന്നാം വർഷ എംബിബിഎസ് വിദ്യാർത്ഥിനിയായ ഹരിപ്പാട് സ്വദേശിനി സാവരിയ ബസന്തിന്റെ മരണം ക്രൂരമായ കൊലപാതകമെന്ന് തെളിയിക്കുന്ന പോസ്റ്റുമോർട്ടം റിപ്പോർട്ട് പുറത്ത്. പെൺകുട്ടിയുടെ ശരീരമാസകലം അതിശക്തമായ മർദനമേറ്റ പാടുകളുണ്ടെന്നും നട്ടെല്ലിന് ഗുരുതരമായ പൊട്ടലുണ്ടെന്നുമാണ് ആലപ്പുഴ വണ്ടാനം മെഡിക്കൽ കോളേജിൽ നടത്തിയ രണ്ടാമത്തെ പോസ്റ്റുമോർട്ടത്തിൽ കണ്ടെത്തിയത്. സംഭവവുമായി ബന്ധപ്പെട്ട് സാവരിയയുടെ സഹപാഠിയും മലപ്പുറം പെരിന്തൽമണ്ണ സ്വദേശിയുമായ സദറുൽ അനവിനെ ഉസ്ബെക്കിസ്ഥാൻ പോലീസ് ഇതിനോടകം അറസ്റ്റ് ചെയ്തിട്ടുണ്ട്.
വിദേശത്ത് വെച്ച് നടന്ന അതിക്രൂരമായ ഈ കൊലപാതകത്തിൽ ഉസ്ബെക്കിസ്ഥാൻ പോലീസിന് പുറമെ കേരള പോലീസും അന്വേഷണം ശക്തമാക്കിയിരിക്കുകയാണ്. മകളുടെ മരണത്തിൽ ദുരൂഹതയുണ്ടെന്ന് കാട്ടി പിതാവ് നൽകിയ പരാതിയിൽ ഹരിപ്പാട് പോലീസ് നിലവിൽ കേസെടുത്ത് എഫ്ഐആർ രജിസ്റ്റർ ചെയ്തിട്ടുണ്ട്. വിദേശത്ത് നടന്ന കുറ്റകൃത്യമായതിനാലും അന്താരാഷ്ട്ര ഏജൻസികളുടെ സഹായം ആവശ്യമുള്ളതിനാലും കേസ് അന്വേഷണം ഉടൻ തന്നെ സംസ്ഥാന ക്രൈം ബ്രാഞ്ചിന് കൈമാറാനാണ് സാധ്യത. അന്വേഷണത്തിന്റെ ഭാഗമായി സാവരിയയുടെ മാതാപിതാക്കളുടെ വിശദമായ മൊഴി വരും ദിവസങ്ങളിൽ പോലീസ് രേഖപ്പെടുത്തും.
സാവരിയയെ പ്രതി സദറുൽ അനാം മതം മാറാൻ നിരന്തരം നിർബന്ധിച്ചിരുന്നുവെന്നും ഇത് പെൺകുട്ടി ശക്തമായി എതിർത്തതാണ് അതിക്രൂരമായ മർദനത്തിലേക്കും കൊലപാതകത്തിലേക്കും നയിച്ചതെന്നും ബന്ധുക്കൾ ആരോപിക്കുന്നു. ഇന്ത്യൻ എംബസി വഴി ഉസ്ബെക്കിസ്ഥാൻ പോലീസ് രജിസ്റ്റർ ചെയ്ത കേസിന്റെ വിശദാംശങ്ങളും എഫ്ഐആർ പകർപ്പും ശേഖരിക്കാനുള്ള നടപടികൾ ഹരിപ്പാട് പോലീസ് ആരംഭിച്ചിട്ടുണ്ട്. അതേസമയം, കൊലക്കുറ്റം ചുമത്തപ്പെട്ട പ്രതിയായ സദറുൽ അനാമിന്റെ രക്ഷിതാക്കൾ നിയമനടപടികൾക്കായി നാട്ടിൽ നിന്ന് ഉസ്ബെക്കിസ്ഥാനിലേക്ക് തിരിച്ചു കഴിഞ്ഞു. വണ്ടാനം മെഡിക്കൽ കോളേജിലെ വിദഗ്ദ്ധ സംഘം തയ്യാറാക്കിയ വിശദമായ ഇൻക്വസ്റ്റ് റിപ്പോർട്ട് ലഭിക്കുന്നതോടെ അന്വേഷണത്തിൽ കൂടുതൽ വ്യക്തത വരുമെന്നാണ് പോലീസ് വൃത്തങ്ങൾ വ്യക്തമാക്കുന്നത്.
