Monday, November 16, 2026

സിഐടിയു തൊഴിലാളി ലോറിയിൽ നിന്ന് കാർ ഇറക്കുന്നതിനിടെ ഷോറൂം ജീവനക്കാരൻ മരിച്ച സംഭവം; വാഹനം ഇറക്കിയത് പരിശീലനമില്ലാത്തയാളെന്ന് ഓട്ടോമൊബൈല്‍ ഡീലേഴ്‌സ് അസോസിയേഷന്‍

തിരുവനന്തപുരം: കൊച്ചിയിൽ സിഐടിയു തൊഴിലാളി ലോറിയിൽ നിന്നും ആഡംബര കാർ പുറത്തിറക്കുന്നതിനിടെ കാറിനടിയിൽപ്പെട്ട് ഷോറൂം ജീവനക്കാരൻ മരിച്ച സംഭവത്തിൽ വിശദീകരണവുമായി കേരള ഓട്ടോമൊബൈല്‍ ഡീലേഴ്‌സ് അസോസിയേഷന്‍. വേണ്ടത്ര പരിശീലനം ലഭിച്ചിട്ടില്ലാത്ത ആളുകള്‍ ഇത്തരം ജോലി ചെയ്യുന്നതിന്റെ പ്രശ്‌നമാണ് സംഭവിച്ചതെന്ന് കേരള ഓട്ടോമൊബൈല്‍ ഡീലേഴ്‌സ് അസോസിയേഷന്‍ ഭാരവാഹികൾ വ്യക്തമാക്കി.

കൊച്ചിയില്‍ നടന്ന അപകടത്തില്‍ പോലീസ് അന്വേഷണം തുടങ്ങി. മട്ടാഞ്ചേരി സ്വദേശി റോഷന്‍ ആന്റണി സേവ്യറാണ് മരണപ്പെട്ടത്. പാലാരിവട്ടം സ്വദേശി ആന്‍ഷാദാണ് വാഹനം ഓടിച്ചിരുന്നത്. മനഃപൂര്‍വമല്ലാത്ത നരഹത്യ, അശ്രദ്ധമായി വാഹനമോടിക്കല്‍ എന്നീ വകുപ്പുകള്‍ ചുമത്തിയാണ് പോലീസ് കേസെടുത്തത്. മാനുഷിക പിഴവോ യന്ത്രത്തകരാറാണോ അപകടത്തിന് കാരണമായത് എന്ന കാര്യത്തിൽ ഇനിയും വ്യക്തത വന്നിട്ടില്ല. ലോറിയിൽ നിന്നും കാർ ഇറക്കുമ്പോൾ ഷിപ്പിംങ് മോഡിലേക്ക് കാർ മാറിയിരുന്നോ എന്നതിലടക്കം അന്വേഷണം ആവശ്യമാണ്. അതേസമയം വാഹനം ഇറക്കാനെത്തിയത് 10 വർഷത്തിലധികം പ്രവർത്തന പരിചയമുള്ളവരെന്നാണ് സിഐടിയു കാർ ഡ്രൈവേർസ് യൂണിയന്റെ വിശദീകരണം.

യൂണിയൻ തൊഴിലാളികളായ അൻഷാദും അനീഷുമായിരുന്നു കാർ ഇറക്കാനെത്തിയത്. ഇരുവരും മുൻപ് ഇതേ യാർഡിലടക്കം കാറുകൾ ഇറക്കിയിരുന്നതായും അപകടകാരണം അന്വേഷിക്കണമെന്നും സിഐടിയു കാർ ഡ്രൈവേർസ് യൂണിയൻ ഇടപ്പളളി മേഖലാ സെക്രട്ടറി എൻപി തോമസ് പറഞ്ഞു.

അപകടം നടന്ന ദിവസം അൻഷാദായിരുന്നു ലോറിയിൽ നിന്നും ഇറക്കുന്ന കാറിന്റെ നിയന്ത്രണം ഏറ്റെടുത്തത്. അനീഷും റോഷനും വശങ്ങളിൽ നിർദേശം നൽകാനായും നിന്നു. ഇതിനിടെയാണ് നിയന്ത്രണം വിട്ട കാർ ഇരുവ‍ർക്കും നേരെ പാഞ്ഞെത്തിയത്. റോഷന്റെ മേൽ കാർ കയറി ഇറങ്ങി. കാർ വീണ്ടും പിന്നോട്ട് നീങ്ങി യാർഡിന് ചുറ്റുമുള്ള ഇരുമ്പുവേലിയിലും റോഡിന് വശത്തെ വൈദ്യുതി പോസ്‌റ്റുകളിലും ഇടിച്ചു നിൽക്കുകയായിരുന്നു.

‘വേണ്ടത്ര പരിശീലനം ലഭിച്ചിട്ടില്ലാത്ത ആളുകള്‍ ഇത്തരം ജോലി ചെയ്യുന്നതിന്റെ പ്രശ്‌നമാണിത്. ട്രേഡ് യൂണിയന്‍ തൊഴിലാളികളാണ് കേരളത്തില്‍ കൂടുതല്‍ ഇത്തരം ജോലികള്‍ ചെയ്യുന്നത്. ഇവര്‍ക്ക് വേണ്ട പരിശീലനം ലഭിച്ചിട്ടുണ്ടോയെന്ന് പരിശോധിക്കണം. ട്രെയിന്‍ഡ് സ്റ്റാഫുകള്‍ തന്നെ വാഹനങ്ങള്‍ ഇറക്കാനുള്ള നിയമപരമായ സര്‍ക്കുലര്‍ ഇറക്കണം. മുഖ്യമന്ത്രിക്കും തൊഴില്‍ വകുപ്പ് മന്ത്രിക്കും നിവേദനം കൊടുക്കുന്നുണ്ട്’, – ഓട്ടോമൊബൈല്‍ ഡീലേഴ്‌സ് അസോസിയേഷന്‍ ഭാരവാഹി രഞ്ജിത്ത് പറഞ്ഞു.

Related Articles

Latest Articles