അപ്രതീക്ഷിത നീക്കങ്ങളാണ് ബിഗ് ബോസ് ഷോയെ പ്രേക്ഷകർക്കിടയിൽ ഇത്രയും ജനപ്രീതി ഉണ്ടാക്കിയെടുത്തത്. ബിഗ്ബോസ് മലയാളം സീസണ്‍ 5 ഫൈനലിലേക്ക് നീങ്ങുകയാണ്. ആരൊക്കെയാകും ടോപ് ഫൈവിൽ എത്തുക എന്നറിയാൻ ആകാംഷയോടെ കാത്തിരിക്കുകയാണ് പ്രേക്ഷകർ. അതേസമയം, ഈ ആഴ്ച ഡബിള്‍ എവിക്ഷന്‍ പ്രതീക്ഷിച്ചിടത്ത് വമ്പൻ ട്വിസ്റ്റാണ് ബിഗ് ബോസ് ഒരുക്കിയത്.
നാദിറ അല്ലെങ്കിൽ റെനീഷ പുറത്താകുമെന്നായിരുന്നു പ്രൊമോയിൽ കാണിച്ചിരുന്നത്. ഇത്തവണത്തെ എവിക്ഷൻ നടപടികൾക്കായി ബിഗ്ബോസ് വീട്ടിന്‍റെ മുന്നില്‍ അഞ്ച് പെട്ടികള്‍ വച്ചിരുന്നു. ആറുപേരാണ് ഇത്തവണ നോമിനേഷനിൽ ഉണ്ടായിരുന്നത്. സെറീന, ജുനൈസ്, ഷിജു, അഖില്‍, റെനീഷ, നാദിറ എന്നിവരായിരുന്നു നോമിനേഷനിലുണ്ടായിരുന്ന മത്സരാർഥികൾ.
മോഹന്‍ലാല്‍ നമ്പര്‍ വിളിക്കുന്നത് അനുസരിച്ച് ഒരോ പെട്ടിയായി ഉള്ളിലേക്ക് എടുത്ത് അതില്‍ വച്ച് പേര് വായിക്കും. അതുവഴി അയാള്‍ സെയ്ഫ് ആകും. ആദ്യത്തെ പെട്ടി നമ്പര്‍ രണ്ട് ആയിരുന്നു. അതിലൂടെ സെറീന സെയ്ഫായി. രണ്ടാമതായി എടുത്തത് ഒന്നാമത്തെ നമ്പര്‍ പെട്ടിയായിരുന്നു. അതിലൂടെ ജുനൈസ് സെയ്ഫായി. മൂന്നാമത് എടുത്തത് നാലാം നമ്പര്‍ പെട്ടിയായിരുന്നു അതിലൂടെ ഷിജുവും, മൂന്നാം നമ്പർ പെട്ടിയിലൂടെ അഖിലും സെയ്ഫായി.
അവസാനം അവശേഷിച്ചത് റെനീഷയും, നാദിറയും ആയിരുന്നു. നാദിറ സെയ്ഫ് ആകണമെന്ന് പറഞ്ഞ് ശോഭയാണ് അഞ്ചാം നമ്പർ പെട്ടി തുറന്നത്. അതില്‍ റെനീഷ സെയ്ഫ് എന്നായിരുന്നു രേഖപ്പെടുത്തിയിരുന്നത്. തുടർന്ന് വികാരഭരിതയായി നാദിറ ബിഗ് ബോസ് വീടിനോട് വിടവാങ്ങി പുറത്തേക്ക് പോകാന്‍ ഇറങ്ങിയെങ്കിലും അപ്പോഴായിരുന്നു വമ്പൻ ട്വിസ്റ്റ്. വാതിൽ തുറന്നപ്പോൾ “വെല്‍ക്കം ടു ഫിനാലെ നാദിറ” എന്നാണ് എഴുതിയിരുന്നത്. ഇതോടെ നാദിറ സെയ്ഫാകുകയും അടുത്ത ആഴ്ച നോമിനേഷനിൽ ഇല്ലാതെ നേരിട്ട് ഫിനാലെയ്ക്കുള്ള യോഗ്യത നേടുകയും ചെയ്തു.
