പുൽവാമ: കശ്മീരിലെ പുൽവാമ ജില്ലയിലെ ത്രാൽ മേഖലയിൽ സുരക്ഷാ സേന ഭീകരരെ നേരിടുന്നു. പുൽവാമയിലെ ത്രാൽ, ബ്രാൻപതേരി മേഖലകളിൽ ഭീകരരുടെ സാന്നിധ്യം ഉണ്ടെന്ന വിവരം ലഭിച്ചിരുന്നു. തുടർന്ന് സുരക്ഷാ സേന നടത്തിയ തിരച്ചിലിനിടെയാണ് ഏറ്റുമുട്ടലുണ്ടായത്. ഏറ്റുമുട്ടൽ ഇപ്പോഴും തുടരുകയാണ്. ഇതിനെത്തുടർന്ന് മേഖലയിലെ ഇന്‍റര്‍നെറ്റ് സേവനങ്ങള്‍ റദ്ദാക്കി.
രാഷ്ട്രീയ റൈഫിള്‍സും എസ്ഒജിയും കശ്മീർ പോലീസും സംയുക്തമായാണ് തിരച്ചിൽ നടത്തിയത്. ഇതിനിടെ ഒളിച്ചിരുന്ന ഭീകരർ വെടിയുതിർക്കുകയായിരുന്നു. ഇതേത്തുടർന്ന് സൈന്യവും ശക്തമായി തിരിച്ചടിച്ചു. മേഖലയിൽ സ്ഥിതിഗതികൾ ശാന്തമായിട്ടില്ല.
