ന്യൂയോർക് : അമേരിക്കയിലെ ഹിന്ദു സമൂഹം രാജ്യത്തിന് നൽകിയ സംഭാവനകളെ ആദരിച്ചു കൊണ്ട് ഒക്ടോബർ മാസത്തെ ഹിന്ദു പൈതൃക മാസമായി പ്രഖ്യാപിച്ച് അമേരിക്കയിലെ ജോർജിയ സംസ്ഥാനം. ജോർജിയ ഗവർണർ ബ്രയാൻ കെംപ് ആണ് ഇത് സംബന്ധിച്ച പ്രഖ്യാപനം നടത്തിയത്.
ഹിന്ദു സംസ്കാരവും ഇന്ത്യയിലെ വൈവിധ്യം നിറഞ്ഞ ആത്മീയ പാരമ്പര്യങ്ങളും അടിസ്ഥാനമാക്കിയാണ് ഹിന്ദു പൈതൃക മാസം ആഘോഷിക്കുകയെന്ന് ഗവർണർ പുറത്തിറക്കിയ പ്രസ്താവനയിൽ പറഞ്ഞു. ജോർജിയയുടെ സമഗ്ര വികസനത്തിന് ഹിന്ദു അമേരിക്കൻ സമൂഹം നിർണായക സംഭാവനകൾ നൽകിയിട്ടുള്ളതായി കഴിഞ്ഞ മാസം 23ന് പുറപ്പെടുവിച്ച പ്രസ്താവനയിൽ പറയുന്നു. ജോർജിയ ഗവർണറുടെ പ്രഖ്യാപനത്തെ അമേരിക്കയിലെ പ്രമുഖ ഹിന്ദു സംഘടനയായ കൊയലീഷൻ ഓഫ് ഹിന്ദൂസ് ഓഫ് നോർത്ത് അമേരിക്ക സ്വാഗതം ചെയ്തു. ഹിന്ദു സമൂഹത്തെ അംഗീകരിച്ച ഗവർണർ ബ്രയാൻ കെംപിന് സംഘടന നന്ദി അറിയിച്ചു