മൈസൂരു : പ്രാത്ഥനകൾ വിഫലമാക്കിക്കൊണ്ട് ചിക്കമംഗളൂരുവിൽ കാണാതായ മലയാളി പെൺകുട്ടി ശ്രീനന്ദയുടെ മൃതദേഹം കണ്ടെത്തി. 1500 അടിയോളം താഴ്ചയിൽ മലയിടുക്കിൽ കുടുങ്ങിയ നിലയിലാണ് മൃതദേഹം കണ്ടെത്തിയത് . മാണിക്കധാര വെള്ളച്ചാട്ടത്തിന് തൊട്ടടുത്ത് നിന്നാണ് മൃതദേഹം കണ്ടെത്തിയത്. മരണത്തിൽ കുടുംബം ദുരൂഹത ആരോപിക്കുന്നുണ്ട്. ചൊവ്വാഴ്ച വൈകുന്നേരത്തോടെയാണ് കുട്ടിയെ കാണാതാകുന്നത്. വനംവകുപ്പുംപോലീസും നാട്ടുകാരുമടങ്ങുന്ന നൂറോളം പേരുടെസംയുക്ത പരിശോധനയിലാണ് മൃതദേഹം കണ്ടെത്തിയത്.
പാലക്കാട് കടമ്പഴിപുറത്തെ രമേശിന്റെ മകൾ ശ്രീനന്ദ(15)യെ ചൊവ്വാഴ്ച വൈകുന്നേരത്തോടെയാണ് കാണാതായത്. 40-ഓളം കുടുംബാംഗങ്ങളുടെ സംഘത്തിനൊപ്പം ചിക്കമംഗളൂരുവിൽ വിനോദയാത്രയക്ക് എത്തിയതായിരുന്നു. ചൊവ്വാഴ്ച വൈകിട്ട് 5:20ന് കുടുംബത്തോടൊപ്പം എടുത്ത ഫോട്ടോയിൽ കുട്ടി പിറകിൽ നിൽക്കുന്നുണ്ട്. എന്നാൽ 5:35ന് എടുത്ത് ഫോട്ടോകളിൽ കുട്ടിയെ കാണാനില്ല.
ബാബുഡാൻ ഗിരി കുന്നുകളിലും പരിസരപ്രദേശങ്ങളിലും വൻ സന്നാഹത്തോടെ നടത്തിയ തെരച്ചിൽ മൂന്ന് ദിവസത്തിലും കുട്ടിയെ കണ്ടെത്താൻ സാധിച്ചിരുന്നില്ല. കർണാടക വനംമന്ത്രി ഈശ്വർ ബി. ഖന്ദ്രെയുടെ നിർദേശപ്രകാരം റാപ്പിഡ് ആക്ഷൻ ഫോഴ്സ്, ദുരന്തനിവാരണ സേന, പോലീസ്, വനംവകുപ്പ്, അഗ്നിരക്ഷാസേന എന്നിവർ സംയുക്തമായാണ് തിരച്ചിലിന് നേതൃത്വം നൽകിയത്. ഡോഗ് സ്ക്വാഡും അത്യാധുനിക ഡ്രോൺ ക്യാമറകളും ഉപയോഗിച്ച് നടത്തിയ തെരച്ചിലൊടുവിലാണ് ഇപ്പോൾ മൃതദേഹം
കണ്ടെത്തിയത്.
