തിരുവനന്തപുരം: കിളിമാനൂരിൽ കാട്ടുപന്നിയുടെ ആക്രമണത്തിൽ ഗൃഹനാഥന് ഗുരുതര പരുക്ക്. കിളിമാനൂർ വർത്തൂർ സ്വദേശി അപ്പുക്കുട്ടൻ(75) ആണ് പരിക്കേറ്റത്. ആക്രമിച്ച പന്നി കൈവരി തകർത്ത് കിണറ്റിൽ വീണു.
ഉച്ചക്ക് രണ്ടു മണിയോടെ വീട്ടുമുറ്റത്തെ കിണറിനരുകിൽ നിന്നിരുന്ന അപ്പുക്കുട്ടനു നേരെ പന്നി പാഞ്ഞെത്തി ഇടിച്ച് തെറിപ്പിക്കുകയായിരുന്നു. അപ്പുകുട്ടൻ ഇടിയേറ്റു വീഴുകയും മുറ്റത്തെ കിണറിന്റെ കൈവരി തകർത്ത് പന്നി കിണറ്റിൽ വീഴുകയും ചെയ്തു. ആക്രമണത്തിൽ അപ്പുക്കുട്ടന്റെ അടിവയറിനു താഴെ ഗുരുതരമായി പരുക്കേൽക്കുകയും ചെയ്തു. ഉടൻ തന്നെ പാരിപ്പള്ളി മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയും തുടർന്ന് വിദഗ്ധ ചികിൽസക്കായി തിരുവനന്തപുരം മെഡിക്കൽ കോളെജിലേക്ക് കൊണ്ടു പോയി. പന്നി കിണറിൽ വീണ വിവരം വനം വകുപ്പിനെ അറിയിച്ചിട്ടുണ്ട്.
