പ്രമുഖ ഹോളിവുഡ് നടൻ മൈക്കൽ കെ വില്യംസ് അന്തരിച്ചു. 54 വയസായിരുന്നു. ഇന്നലെ ഉച്ചയോടെയാണ് നടനെ ന്യൂയോര്‍ക്ക് സിറ്റിയിലെ ആഢംബര വസതിയായ വില്യംസ്ബര്‍ഗ് അപ്പാര്‍ട്ട്‌മെന്റില്‍ മരിച്ച നിലയില്‍ കണ്ടത്. അമേരിക്കന്‍ സീരീസായ ‘ദ വയര്‍’ലൂടെ പ്രശസ്‌തനായ താരമാണ് മൈക്കൽ.
അദ്ദേഹത്തിന്റെ അനന്തരവനാണ് വില്യംസിനെ മരിച്ച നിലയിൽ കണ്ടത്. കഴിഞ്ഞ കുറച്ചു ദിവസങ്ങളായി വില്ല്യംസിനെക്കുറിച്ച് വിവരമൊന്നും ഇല്ലാതിരുന്നതിനാല്‍ തിരക്കിയെത്തിയതായിരുന്നു മരുമകന്‍.
ബലപ്രയോഗത്തിലൂടെ അകത്തുകടന്നതിന്റെ ലക്ഷണമില്ലെന്ന് പൊലീസ് പറഞ്ഞു. മയക്കുമരുന്ന് അമിതമായി കഴിച്ചതാണ് മരണ കാരണം എന്നാണ് പ്രാഥമിക നിഗമനം. ദി വയർ, ബോഡി ബ്രോക്കേഴ്സ്, ബ്രോഡ്‍വാക്ക് എംപയർ തുടങ്ങി നിരവധി സിനിമാ, സീരീസുകളിൽ പ്രധാന വേഷങ്ങള്‍ അവതരിപ്പിച്ചിട്ടുണ്ട്. 2021-ലെ എമ്മി അവാര്‍ഡിനായി അഞ്ചു തവണ നാമനിര്‍ദേശം ചെയ്യപ്പെട്ട നടനാണ് മൈക്കല്‍ വില്യംസ്. 2002 മുതല്‍ 2008 വരെ തുടര്‍ച്ചയായി ഓടിയ ദ വയര്‍ സീരീസിലെ ഒമര്‍ ലിറ്റില്‍ എന്ന കഥാപാത്രമാണ് വില്യംസിന് നിരവധി ആരാധകരെ നേടിക്കൊടുത്തത്.
