ചെന്നൈ : അശ്ലീല പരാമർശത്തിൽ നടൻ മൻസൂർ അലിഖാന്റെ മാപ്പപേക്ഷ അംഗീകരിച്ച് നടി തൃഷ. നടനോട് ക്ഷമിച്ചിരിക്കുന്നതായി താരം സമൂഹമാദ്ധ്യമത്തിൽ പങ്കുവച്ച കുറിപ്പിലൂടെ വ്യക്തമാക്കി. തെറ്റ് പറ്റുന്നത് മാനുഷികമാണ്, ക്ഷമിക്കുന്നതാണ് ദൈവീകം എന്നാണ് താരം ട്വിറ്ററിൽ കുറിച്ചത്.
അതേസമയം, നടനെതിരെ നിയമ നടപടി സ്വീകരിക്കണം എന്ന ആവശ്യമാണ് നടിയുടെ ആരാധകരിൽ നിന്നും ഉയരുന്നത്. അശ്ലീല പരാമർശത്തിൽ രൂക്ഷമായ വിമർശനം ഉയരുകയും പോലീസ് കേസ് എടുക്കുകയും ചെയ്ത സാഹചര്യത്തിലാണ് മാപ്പ് പറഞ്ഞ് നടൻ രംഗത്ത് എത്തിയത്. വാക്കുകൾ സഹപ്രവർത്തകയായ തൃഷയെ വേദനിപ്പിച്ചുവെന്ന് മനസ്സിലാക്കുന്നു. ദയവായി ക്ഷമിക്കുക എന്നായിരുന്നു മൻസൂർ അലിഖാൻ പറഞ്ഞത്.
വിജയ് നായകനായി എത്തിയ ‘ലിയോ’ എന്ന സിനിമയിലാണ് മൻസൂർ അലി ഖാനും നടി തൃഷയും അവസാനമായി ഒരുമിച്ച് അഭിനയിച്ചത്. ചിത്രത്തിൽ തൃഷയാണ് നായിക എന്നറിഞ്ഞപ്പോൾ കിടപ്പറ രംഗമുണ്ടാകുമെന്നാണ് താൻ പ്രതീക്ഷിച്ചിരുന്നതെന്നായിരുന്നു മൻസൂർ അലി ഖാൻ വിവാദ പ്രസ്താവന. എന്നാൽ, താൻ തെറ്റായി ഒന്നും പറഞ്ഞിട്ടില്ലെന്നായിരുന്നു താരത്തിന്റെ വാദം. തുടർന്ന് മൻസൂർ അലി ഖാനെതിരെ വൻ പ്രതിഷേധങ്ങളാണ് ഉയർന്നു വന്നത്. ദേശീയ വനിതാ കമ്മീഷനും നടനെതിരെ സ്വമേധയാ കേസെടുത്തിരുന്നു. ഇതിന് പിന്നാലെയായിരുന്നു നടൻ മാപ്പ് പറഞ്ഞത്.
