വാഷിംഗ്ടൺ : വെനസ്വേലയിലെ പുതിയ ഭരണകൂടത്തിന് കടുത്ത ഉപാധികളുമായി അമേരിക്കൻ പ്രസിഡന്റ് ഡൊണാൾഡ് ട്രമ്പ് . ചൈന, റഷ്യ, ഇറാൻ, ക്യൂബ എന്നീ രാജ്യങ്ങളുമായുള്ള സാമ്പത്തിക ബന്ധം പൂർണ്ണമായും അവസാനിപ്പിച്ചാൽ മാത്രമേ വെനസ്വേലയെ കൂടുതൽ എണ്ണ ഉത്പാദിപ്പിക്കാൻ അനുവദിക്കൂ എന്ന് ട്രമ്പ് അറിയിച്ചു. മുൻ പ്രസിഡന്റ് നിക്കോളാസ് മഡൂറോയെ അമേരിക്ക പിടികൂടിയതിന് പിന്നാലെ അധികാരമേറ്റ ഇടക്കാല പ്രസിഡന്റ് ഡെൽസി റോഡ്രിഗസിനോടാണ് ഈ ആവശ്യങ്ങൾ ഉന്നയിച്ചത്. എണ്ണ ഉത്പാദനത്തിൽ അമേരിക്കയുമായി മാത്രം പങ്കാളിത്തം പുലർത്തണമെന്നും ക്രൂഡ് ഓയിൽ വിൽപനയിൽ അമേരിക്കയ്ക്ക് മുൻഗണന നൽകണമെന്നുമാണ് ട്രമ്പിന്റെ പ്രധാന നിബന്ധനകൾ.
വെനസ്വേലയുടെ എണ്ണ സമ്പത്തിന്മേൽ തനിക്കാണ് നിയന്ത്രണമെന്ന് അവകാശപ്പെട്ട ട്രമ്പ് , ഇടക്കാല ഭരണകൂടം 3 കോടി മുതൽ 5 കോടി ബാരൽ വരെ എണ്ണ അമേരിക്കയ്ക്ക് കൈമാറുമെന്ന് പ്രഖ്യാപിച്ചു. വിപണി വിലയ്ക്ക് വിൽക്കുന്ന ഈ എണ്ണയിൽ നിന്നുള്ള വരുമാനം തന്റെ നേരിട്ടുള്ള നിയന്ത്രണത്തിലായിരിക്കുമെന്നും അത് വെനസ്വേലയിലെയും അമേരിക്കയിലെയും ജനങ്ങളുടെ നന്മയ്ക്കായി ഉപയോഗിക്കുമെന്നും ട്രമ്പ് വ്യക്തമാക്കി. നിലവിൽ വെനസ്വേലയുടെ പക്കലുള്ള എണ്ണ ടാങ്കറുകൾ നിറഞ്ഞുകവിഞ്ഞ അവസ്ഥയിലാണെന്നും ഏതാനും ആഴ്ചകൾക്കുള്ളിൽ രാജ്യം സാമ്പത്തികമായി തകരാൻ സാധ്യതയുണ്ടെന്നും യുഎസ് വിദേശകാര്യ സെക്രട്ടറി മാർക്കോ റൂബിയോ വിലയിരുത്തി. ഈ പ്രതിസന്ധി മുതലെടുത്ത് വെനസ്വേലയെ തങ്ങളുടെ നിബന്ധനകൾക്ക് വഴങ്ങാൻ നിർബന്ധിക്കാമെന്നാണ് വാഷിംഗ്ടണിന്റെ കണക്കുകൂട്ടൽ.
അമേരിക്കൻ സൈന്യത്തെ വിന്യസിക്കാതെ തന്നെ വെനസ്വേലയുടെ എണ്ണക്കപ്പലുകളുടെയും ടാങ്കറുകളുടെയും നിയന്ത്രണം ഏറ്റെടുക്കാനാണ് യുഎസ് നീക്കം. ഹവാനയിലേക്കോ മറ്റ് സഖ്യരാജ്യങ്ങളിലേക്കോ ഇനി എണ്ണ ടാങ്കറുകൾ പോകില്ലെന്ന് സെനറ്റ് ആംഡ് സർവീസസ് കമ്മിറ്റി ചെയർമാൻ റോജർ വിക്കർ സ്ഥിരീകരിച്ചു. ചൈനയാണ് നിലവിൽ വെനസ്വേലയിൽ നിന്നുള്ള എണ്ണയുടെ പ്രധാന ഉപഭോക്താക്കൾ എന്നിരിക്കെ, ട്രമ്പിന്റെ ഈ നീക്കം ആഗോള രാഷ്ട്രീയത്തിലും ഊർജ്ജ വിപണിയിലും വലിയ ചലനങ്ങൾ സൃഷ്ടിക്കുമെന്ന് ഉറപ്പാണ്. എനർജി സെക്രട്ടറി ക്രിസ് റൈറ്റിനാണ് ഈ പദ്ധതികൾ നടപ്പിലാക്കാനുള്ള ചുമതല നൽകിയിരിക്കുന്നത്.
