തിരുവനന്തപുരം: വ്യജ നമ്പറുണ്ടാക്കി ബൈക്കിൽ ചുറ്റിക്കറങ്ങി മാലമോഷണം നടത്തുന്ന സംഘത്തിലെ രണ്ടുപേർ പിടിയിൽ.വഞ്ചിയൂർ സ്വദേശി ബിജു,റിനോ ഫ്രാൻസിസ് എന്നിവരാണ് പിടിയിലായത്. ശ്രീകാര്യം പൊലീസാണ് പ്രതികളെ അറസ്റ്റ് ചെയ്തത്.കല്ലംപള്ളി, ഇളംകുളം, ചെറുവയ്ക്കൽ, കരിമ്പുംകോണം തുടങ്ങിയ സ്ഥലങ്ങളിൽ ബൈക്കിൽ കറങ്ങി മാല പൊട്ടിച്ച സംഘമാണ് പിടിയിലായത്. ഇവർ മോഷണം നടത്തുന്ന സി സി ടി വിയുടെ ദൃശങ്ങൾ പൊലീസിന് ലഭിച്ചിട്ടുണ്ട്.
വ്യാജ നമ്പറുള്ള ബൈക്കിലെത്തി മാല പൊട്ടിച്ചശേഷം നമ്പറും നിറവും മാറ്റിയശേഷമാണ് പ്രതികൾ അടുത്ത മോഷണം നടത്തുന്നത്. പ്രായമായ സ്ത്രീകളുടെ മാലകളാണ് പ്രതികൾ പൊട്ടിച്ചെടുത്തത്. നാലു സ്ഥലങ്ങളിലായി 12 പവനോളം മാലകളാണ് പ്രതികൾ പൊട്ടിച്ചത്. ശ്രീകാര്യം ഇൻസ്പെക്ടർ കെ.ആർ. ബിജു, എസ്.ഐമാരായ ബിനോദ് കുമാർ, എം. പ്രശാന്ത്, സി.പി.ഒമാരായ വിനീത്, സന്ദീപ്, പ്രശാന്ത്, ബിനു, ഷെർഷ ഖാൻ, വിനോദ്, ദീപു തുടങ്ങിയവരാണ് പ്രതികളെ പിടികൂടിയത്.
