ഓരോ വയസ്സ് കടന്ന് പോകുംതോറും നമ്മുടെ ശരീരത്തിലും അതിന്റെതായ മാറ്റങ്ങൾ വരാറുണ്ട്.മുടിയില് നര വരുന്നതും ചര്മ്മത്തില് ചുളിവുകള് വീഴുന്നതും ആരോഗ്യം ക്ഷയിക്കുന്നതുമെല്ലാം ഇതിന്റെ ഭാഗം തന്നെ. നമ്മള് ഓരോ പ്രായം കഴിയുമ്പോഴും വേണ്ട വിധത്തില് ആരോഗ്യത്തിനും ശ്രദ്ധ നല്കേണ്ടത് അനിവാര്യമാണ്.പ്രായം കൂടുമ്പോള് പലവിധത്തിലുള്ള ജീവിത ശൈലീ രോഗങ്ങള് നിങ്ങളെ കാര്ന്ന് തിന്നെന്നും വരാം. പ്രത്യേകിച്ച് പ്രമേഹം, അമിത രക്തസമ്മര്ദ്ദം, കൊളസ്ട്രോള്, അതുപോലെ, എല്ല് തേയ്മാനം, മറവി രോഗം, വിഷാദം, വാതം, മാനസികാസ്വസ്ഥതകള് എന്നിങ്ങനെ ഒരു നീണ്ട ലിസ്റ് തന്നെയുണ്ട്.ഇത്തരം രോഗങ്ങളെ നമ്മളില് നിന്നും അകറ്റി ചുറുചുറുക്കോടെ നല്ല ആരോഗ്യത്തോടെ ജീവിക്കാന് നമ്മള് ശീലിക്കേണ്ട കാര്യങ്ങള് എന്തെല്ലാമെന്ന് നോക്കാം.
ചര്മ്മം
നമ്മളുടെ പ്രായം ആദ്യം പ്രതിഫലിക്കുന്നത് നമ്മളുടെ ചര്മ്മത്തിലാണ്. അതിനാല് തന്നെ ചര്മ്മത്തിന്റെ ആരോഗ്യം മികച്ചതാക്കി നിലനിര്ത്തേണ്ടത് അനിവാര്യം തന്നെ. കൃത്യമായ രീതിയില് സണ്സ്ക്രീന് ഉപയോഗിച്ചും ചര്മ്മത്തിന്റെ ആരോഗ്യം നിലനിര്ത്തുന്ന ആഹാരങ്ങള് ശീലിച്ചും വ്യായാമം ചെയ്തും ചര്മ്മത്തിനെ നമ്മള് കൃത്യമായി പരിപാലിക്കണം. ഇടയ്ക്ക് മൃതകോശങ്ങളെ നീക്കം ചെയ്യുന്നതിനായി സ്ക്രബ് ചെയ്യുന്നതും നല്ലതാണ്.
വ്യായാമം
ക്യത്യാമായി ദിവസേന വ്യായാമം ചെയ്യേണ്ടത് അനിവാര്യമായിട്ടുള്ള കാര്യമാണ്. നമ്മളുടെ മൊത്തത്തിലുള്ള ആരോഗ്യം മെച്ചപ്പെടുത്തുന്നതിനും ചര്മ്മത്തിന്റേയും മുടിയുടേയും ആരോഗ്യം നിലനിര്ത്തുന്നതിനും ജീവിതശൈലീ രോഗങ്ങളെ അകറ്റി നിര്ത്തുന്നതിനെല്ലാം വ്യായാമം സഹായിക്കും.
എന്നും ദിവസേന നടക്കാന് പോകുന്നതോ, അല്ലെങ്കില് ജോഗിംഗ് എന്നിങ്ങനെ ചെറിയ ചെറിയ വ്യായാമങ്ങള് ചെയ്യാവുന്നതാണ്. അല്ലെങ്കില് യോഗ ശീലിക്കുന്നതും നല്ലതുതന്നെ. വ്യായാമം ചെയ്യുന്നതിലൂടെ പേശികളുടെ ബലം നിലനിര്ത്തുന്നതിനും ശരീരം ക്ഷയിക്കാതെ പുഷ്ടിയോടെ നിലനിര്ത്തുന്നതിനും ഇത് സഹായിക്കും.
ആഹാരം
നല്ല ആരോഗ്യകരമായ ഭക്ഷണം കഴിക്കാന് ശീലിക്കേണ്ടത് അനിവാര്യമായിട്ടുള്ള കാര്യമാണ്. ഫാസ്റ്റ് ഫുഡ് മാറ്റി, ഉപ്പും മുളകും കുറച്ച് നല്ല പച്ചക്കറികളും പഴവര്ഗ്ഗങ്ങളും ആവശ്യത്തിന് പ്രോട്ടീനും ശരീരത്തില് എത്തുന്നവിധത്തില് ഡയറ്റ് ചിട്ടപ്പെടുത്തുന്നത് നല്ലതാണ്. ഇത് ആരോഗ്യത്തിന് കൂടുതല് ഗുണം നല്കും.
നമ്മളുടെ ചർമ്മത്തിന്റെ ആരോഗ്യത്തിനായാലും മുടിയുടെ ആരോഗ്യത്തിനും അവയവങ്ങള് കൃത്യമായി പ്രവര്ത്തിക്കുന്നതിനും ആരോഗ്യത്തോടെ ഇരിക്കുനന്തിനും നല്ല ആഹാരശീലങ്ങള് നമ്മളെ സഹായിക്കും.
നല്ല ശീലങ്ങള്
മദ്യപാനം പുകവലി എന്നിങ്ങനെയുള്ള ദുശ്ശീലങ്ങളോട് വിട പറയുന്നത് നല്ലതായിരിക്കും. ഇത്തരം ശീലങ്ങള് നമ്മളുടെ ആരോഗ്യം വേഗത്തില് ക്ഷയിപ്പിക്കുന്നതിന് കാരണമാകുന്നുണ്ട്. ഇത് നമ്മളുടെ ആയുസ്സ് കുറയ്ക്കാന് വരെ കാരണക്കാരാകുന്നു. അതിനാല്, ഇത്തരം ദുശ്ശീലങ്ങളെ അകറ്റുന്നത് നല്ലതായിരിക്കും.
നല്ല ഉറക്കം
നല്ല പോലെ ഉറക്കം ലഭിച്ചാല് തന്നെ നമ്മളുടെ പാതി അസുഖവും ക്ഷീണവും മാറി എന്ന് പറയാം. നല്ല പോലെ ഉറങ്ങുന്ന ഒരാളില് മാനസിക സമ്മര്ദ്ദം കുറവായിരിക്കും. അതുപോലെ, നല്ല ആരോഗ്യമുള്ള ചര്മ്മവും ഇവരില് കണ്ടെന്ന് വരാം. നല്ല ഉറക്കം ലഭിച്ചാല് അന്നത്തെ ദിവസം കിട്ടുന്ന ഊര്ജവും ചില്ലറയല്ല. ഒരു ദിവസത്തെ നല്ല രീതിയില് നോക്കി കാണുന്നതിന് ഇത് സഹായിക്കുന്നുണ്ട്.