ദില്ലി: ഭീകരസംഘടനയായ ലഷ്‌കര്‍ ഇ ത്വയിബയുമായി ബന്ധമുള്ള 5 ഭീകരര്‍കാശ്മീരില്‍ പിടിയിലായി. ഇവരില്‍ നിന്ന് വന്‍ ആയുധ ശേഖരവും സൈന്യം പിടിച്ചെടുത്തു.
ബുദ്ഗാം പൊലീസും 53 രാഷ്ട്രീയ റൈഫിള്‍സും സി ആര്‍ പി എഫും ചേര്‍ന്ന് നടത്തിയ സംയുക്ത നീക്കത്തിലാണ് ലഷ്‌കര്‍ ഭീകരര്‍ പിടിയിലായത്. നേരത്തെ പിടിയിലായ ലഷ്‌കര്‍ ഭീകരന്‍ സഹൂര്‍ വാനിയെ ചോദ്യം ചെയ്തതില്‍ നിന്നു ലഭിച്ച വിവരങ്ങള്‍ അനുസരിച്ചായിരുന്നു സൈന്യത്തിന്റെ നീക്കം. ഭീകരര്‍ ഒളിഞ്ഞിരിക്കുന്ന താവളത്തെക്കുറിച്ച് ലഭിച്ച വ്യക്തമായ വിവരത്തെ തുടര്‍ന്ന് സൈന്യം നടത്തിയ മിന്നല്‍ നീക്കത്തില്‍ ഭീകരര്‍ക്കൊപ്പം വെടിക്കോപ്പുകളും മറ്റ് ആയുധങ്ങളും പിടിച്ചെടുത്തിട്ടുണ്ട്.
ലഷ്‌കര്‍ ഭീകരന്‍ യൂസഫ് കന്ത്രുവിന്റെ അടുത്ത അനുയായികളില്‍ ഒരാളും പിടിയിലായ ഭീകരരുടെ കൂട്ടത്തിലുണ്ട്. അയാളുടെ വീട്ടില്‍ നിന്നും 200 മീറ്റര്‍ അകലെയായിട്ടായിരുന്നു ഭീകരരുടെ ഒളിത്താവളം. യൂനുസ് മിര്‍, അസ്ലാം ഷെയ്ഖ്, പര്‍വേസ് ഷെയ്ഖ്, റഹ്മാന്‍ ലോണ്‍ എന്നിവരാണ് പിടിയിലായ മറ്റ് ഭീകരര്‍.
മേഖലയില്‍ സജീവ ആക്രമണങ്ങള്‍ക്ക് തയ്യാറെടുക്കുന്ന ഭീകരര്‍ക്ക് സന്ദേശങ്ങളും അവശ്യ സാധനങ്ങളും എത്തിച്ചു കൊടുക്കുന്നവരാണ് പിടിയിലായിരിക്കുന്ന ഭീകരര്‍ എന്ന് പൊലീസ് പറഞ്ഞു. ഇവര്‍ക്കെതിരെ ഖാന്‍സാഹിബ് പൊലീസ് സ്റ്റേഷനില്‍ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.
