തിരുവനന്തപുരം: മഹാരാഷ്ട്രയിൽ രണ്ട് സന്യാസികൾ ഉൾപ്പെട്ട സംഘത്തെ ആൾക്കൂട്ടം തല്ലിക്കൊന്ന സംഭവത്തിൽ അതിന് പിന്നിൽ പ്രവർത്തിച്ച എല്ലാ സംഘടനകളേയും നിയമപരമായി നിരോധിക്കേണ്ടത് ഈ നാടിൻ്റെ സുരക്ഷയ്ക്ക് അത്യാവശ്യമാണെന്ന് ചലച്ചിത്ര സംവിധായകനും സാംസ്കാരിക പ്രവർത്തകനുമായ വിജി തമ്പി. ഈ ദാരുണ സംഭവത്തിൽ നിറം നോക്കി പ്രതികരിക്കാതിരിക്കുന്ന ബുദ്ധിജീവികളും സാംസ്കാരിക നായകന്മാരും അറിഞ്ഞോ അറിയാതെയോ രാജ്യദ്രോഹ പക്ഷത്ത് അണിചേരുകയാണ്.
ഭാരത സംസ്കൃതിയുടേയും സനാതന ധർമ്മത്തിൻ്റെയും ജ്യോതി വാഹകരാണ് നമ്മുടെ സന്യാസി പരമ്പര.ഈ രാഷ്ട്രത്തിൻ്റെ പാരമ്പര്യം തലമുറ തലമുറ കൈമാറി നമ്മളിൽ എത്തിച്ചതും ഇനി അടുത്ത തലമുറകളിലേക്ക് കൈമാറുന്നതും സന്യാസി പരമ്പര തന്നെയായിരിക്കും. സന്യാസിമാരെ കാവിവസ്ത്രത്തിൽ ആർക്കും തിരിച്ചറിയാം. അങ്ങനെ തിരിച്ചറിഞ്ഞിട്ടും അവർ നിഷ്ഠുരമായി കൊലചെയ്യപ്പെട്ടുവെങ്കിൽ കൃത്യം നിർവഹിച്ചവർ ഈ നാടിൻ്റെ ശത്രുകളാണ്. ഭാരതത്തിനുള്ളിൽ ഈ രാഷ്ട്രത്തെ നശിപ്പിക്കണമെന്നാഗ്രഹിക്കുന്ന രാഷ്ട്ര ദ്രോഹ ശക്തികൾ പ്രബലമാണെന്നും അദ്ദേഹം പറഞ്ഞു.
