ദില്ലി : സര്‍ക്കാര്‍ മൊബൈല്‍ ഫോണുകളുടെ ജിഎസ്ടി വര്‍ദ്ധിപ്പിച്ചപ്പോൾ സാംസങ്ങ് തങ്ങളുടെ രണ്ട് മോഡലുകളുടെ വില വെട്ടിക്കുറച്ചു. സാംസങ്ങ് ഗ്യാലക്സി എം21, ഗ്യാലക്സി എ50 എന്നിവയുടെ വിലയാണ് ഇന്ത്യയില്‍ വെട്ടിക്കുറച്ചത്.
നേരത്തെ ഗ്യാലക്സി എം21 4ജിബി+64 ജിബി പതിപ്പ് 14,222 രൂപയ്ക്കും. ഇതേ ഫോണിന്‍റെ 6ജിബി+128ജിബി പതിപ്പ് 16,326 രൂപയ്ക്കുമാണ് വില്‍പ്പനയ്ക്ക് എത്തിയത്. ഇപ്പോള്‍ ഇരു മോഡലുകളുടെ വില 4ജിബി പതിപ്പിന് 13,199 രൂപയാണ്. 6ജിബി പതിപ്പ് ലഭിക്കുക 15,499 രൂപയ്ക്കാണ്. ഇതേസമയം ഗ്യാലക്സി എ50 ന്‍റെ 4ജിബി റാം + 128ജിബി ഇന്‍റേണല്‍ മെമ്മറി പതിപ്പിന് 21,070 ആയിരുന്നു വില. ഇതേ ഫോണിന്‍റെ 6ജിബി+128ജിബി പതിപ്പിന് വില 26,900 ആയിരുന്നു.ഇതില്‍ ഇപ്പോള്‍ കുറവ് വരുത്തി യഥാക്രമം 18,599 രൂപയും, 20,591 രൂപയുമാണ് പുതിയ വില. ഈ വിലകള്‍ ഇപ്പോള്‍ തന്നെ സാംസങ്ങിന്‍റെ ഔദ്യോഗിക വെബ് സൈറ്റില്‍ ലഭ്യമാണ്.
സാംസങ്ങ് എം21 ല്‍ സാംസങ്ങിന്‍റെ എക്സിനോസ് 9 ഒക്ടാ 9611 ചിപ്പാണ് ഉപയോഗിച്ചിരിക്കുന്നത്. 6.4 ഇഞ്ചാണ് ഫോണിന്‍റെ സ്ക്രീന്‍ വലിപ്പം. പിന്നില്‍ ട്രിപ്പിള്‍ ക്യാമറയാണ് ഉള്ളത്. ഇത് 48 MP + 8 MP + 5 MP എന്ന മൊഡ്യൂളിലാണ്. 20 എംപിയാണ് മുന്നിലെ ക്യാമറ. 6000 എംഎഎച്ചാണ് ഫോണിന്‍റെ ബാറ്ററി ശേഷി. എന്നാൽ ലോക്ക്ഡ‍ൗണിനെ തുടർന്ന് ഇപ്പോള്‍ രാജ്യത്തിന്‍റെ പലഭാഗത്തും ഫോണുകള്‍ ഹോം ഡെലിവറിയില്ല. അതിനാല്‍ ഇത് വിപണി വിലയില്‍ പ്രതിഫലിക്കാന്‍ ലോക്ക്ഡൗണ്‍ കഴിയേണ്ടിവരും.
