അരൂര്: അരൂര്-ഇടക്കൊച്ചി പാലത്തില് ബൈക്ക് യാത്രികന്റെ കഴുത്തില് ചൂണ്ടയുടെ ടങ്കീസ് കുരുങ്ങി. കഴുത്തിൽ പരിക്കേറ്റു. അരൂര് കോന്നോത്ത് ബോണിഫസിന്റെ (49) കഴുത്തിലാണ് ടങ്കീസ് കുരുങ്ങിയത്. എന്നാൽ പെട്ടെന്ന് ബൈക്ക് നിയന്ത്രിച്ചതിനാല് വൻ അപകടമാണ് ഒഴിവായത്.
ബോണിഫസിന്റെ കൂടെ മകളും ഉണ്ടായിരുന്നു. ഈ സമയം പാലത്തിന്റെ ഇരുഭാഗങ്ങളിലുമായി ഇരുപതിലേറെ പേര് ചൂണ്ടയിടാന് ഉണ്ടായിരുന്നെന്ന് ബോണിഫസ് പറഞ്ഞു. കൂടുതലും അന്യസംസ്ഥാന തൊഴിലാളികളായിരുന്നു.
ടങ്കീസ് ബൈക്ക് യാത്രികന്റെ കഴുത്തില് കുരുങ്ങിയെന്ന് മനസ്സിലായതോടെ ചൂണ്ടയിട്ട് കൊണ്ടിരുന്നവരെല്ലാം സ്ഥലം വിട്ടു. ബോണിഫസ് അരൂര് ഗവ.ആശുപത്രിയില് ചികിത്സതേടി. സംഭവത്തിൽ അരൂര് പോലീസില് പരാതി നല്കി.