ചെന്നൈ : ചെന്നൈ സൂപ്പർ കിങ്സ് ടീം മാനേജ്മെന്റിനും ആരാധകർക്കും കനത്ത തിരിച്ചടി നൽകിക്കൊണ്ട് ഇന്ത്യൻ പ്രീമിയർ ലീഗിന്റെ വരുന്ന സീസണിലെ മുഴുവൻ മത്സരങ്ങളും ഇംഗ്ലിഷ് ക്യാപ്റ്റൻ ബെൻ സ്റ്റോക്സ് കളിക്കില്ല എന്ന തരത്തിലുള്ള റിപ്പോർട്ടുകൾ പുറത്തു വന്നു. ഐപിഎല്ലിനിടയിൽ നടക്കുന്ന ഇംഗ്ലണ്ട്– അയർലൻഡ് ടെസ്റ്റ് മത്സരത്തിനായി ബെൻ സ്റ്റോക്സിനു നാട്ടിലേക്കു മടങ്ങും . ജൂൺ ഒന്നിനു ലോഡ്സിലാണ് അയർലൻഡിനെതിരായ ടെസ്റ്റ് ആരംഭിക്കുന്നത്. മത്സരത്തിൽ ഇംഗ്ലണ്ടിനായി താൻ കളത്തിലിറങ്ങുമെന്ന് ബെൻ സ്റ്റോക്സ് സ്ഥിരീകരിച്ചിട്ടുണ്ട്. താരലേലത്തിൽ 16.25 കോടി രൂപ എന്ന വൻ തുക ചെലവിട്ടാണ് ഇംഗ്ലിഷ് താരത്തെ ചെന്നൈ വാങ്ങിയത്. ടെസ്റ്റിൽ കളിക്കാൻ തീരുമാനിച്ച സാഹചര്യത്തിൽ മത്സരത്തിന് പത്തു ദിവസം മുൻപു താരത്തിന് ഇംഗ്ലണ്ടിലേക്കു മടങ്ങേണ്ടിവരും.
ലീഗിലെ ഏതാനും മത്സരങ്ങളിലും ടീം പ്ലേ ഓഫിലെത്തിയാൽ ആ മത്സരങ്ങളിലും വൻ തുക മുടക്കി ടീമിലെത്തിച്ച താരത്തിന്റെ സേവനം ചെന്നൈക്ക് ലഭ്യമാകില്ല . അയർലൻഡിനെതിരെ കളിക്കണോ, വേണ്ടയോ എന്നു ഐപിഎല്ലിലുള്ള മറ്റ് ഇംഗ്ലണ്ട് താരങ്ങൾക്കു തീരുമാനിക്കാമെന്നു പറഞ്ഞ് മറ്റുള്ള ടീമുകളുടെ ഉറക്കവും സ്റ്റോക്സ് കെടുത്തിയിട്ടുണ്ട്.