അടൂര്: നിരവധി ക്രിമിനല് കേസുകളിലെ പ്രതിയെ കാപ്പ നിയമ പ്രകാരം അറസ്റ്റ് ചെയ്ത് ജയിലിലടച്ചു.
അടൂര് ഏറത്ത് ആറുകാലിക്കല് പടിഞ്ഞാറ്, കുതിരമുക്ക് ഉടയന്വിള കിഴക്കേതില് ശ്യാം കുമാറിനെ(23)
യാണ് കാപ്പ ചുമത്തി ആറുമാസത്തേക്ക് തിരുവനന്തപുരം സെന്ട്രല് ജയിലിലടച്ചത്.
പത്തനംതിട്ട ജില്ല പോലീസ് മേധാവിയുടെ റിപ്പോര്ട്ടിന്റെ അടിസ്ഥാനത്തില് ജില്ലാ മജിസ്ട്രേറ്റ് കൂടിയായ
പത്തനംതിട്ട ജില്ലാ കളക്ടറാണ് കരുതല് തടങ്കല് ഉത്തരവ് പുറപ്പെടുവിച്ചത്. അടൂര് പോലീസ്
ഇന്സ്പെക്ടറുടെ നേതൃത്വത്തിലുള്ള അന്വേഷണ സംഘം ശ്യാംകുമാറിനെ അറസ്റ്റ് ചെയ്യുകയായിരുന്നു.
അടൂര്, കൊടുമണ് പോലീസ് സ്റ്റേഷന് പരിധികളിലായി വധശ്രമം, വീടുകയറി ദേഹോപദ്രവം ഏല്പിക്കല്, സംഘം ചേര്ന്ന് ആക്രമിക്കല്, മോഷണം തുടങ്ങിയ പത്തോളം ഗുരുതര കുറ്റകൃത്യങ്ങളില് ഇയാള് പ്രതിയാണെന്ന് പോലീസ് പറഞ്ഞു.