ദില്ലി: പ്രധാനമന്ത്രി നരേന്ദ്ര മോദി വളരെ മനസ്സലിവുള്ള വ്യക്തിയാണെന്നു പറഞ്ഞുകൊണ്ട് ഒരു അനുഭവം പങ്കുവെച്ചിരിക്കുകയാണ് ആഭ്യന്തര മന്ത്രി അമിത് ഷാ. സഹജീവികളോടുള്ള പ്രധാനമന്ത്രി നരേന്ദ്ര മോദിയുടെ സ്നേഹം വ്യക്തമാക്കുന്ന അനുഭവമാണ്‌ അമിത് ഷാ പറഞ്ഞത്. ഒരു സുപ്രധാനയോഗത്തിൽ പങ്കെടുക്കുന്നതിനിടെ പ്രധാനമന്ത്രി മോദി ഒരു മയിലിനു തീറ്റ കൊടുത്ത സംഭവമായിരുന്നു അമിത് ഷാ പങ്കുവെച്ചത്. മോദി അറ്റ് 20: ഡ്രീംസ് മീറ്റ് ഡെലിവറി എന്ന പുസ്തകത്തിൻ്റെ പ്രകാശനവേദിയിലായിരുന്നു സംഭവം നടന്നത്. “പ്രധാനമന്ത്രിയുടെ ഓഫീസിൽ ഒരിക്കൽ ഒരു സുപ്രധാന യോഗം നടക്കുകയായിരുന്നു. ഈ സമയത്ത് യോഗം നടക്കുന്ന മുറിയുടെ ജനലിൽ ഒരു മയിൽ കൊത്തുന്നുണ്ടായിരുന്നു. കുറച്ചു സമയത്തിനു ശേഷം മയിലിനു വിശക്കുന്നുണ്ടെന്ന് പ്രധാനമന്ത്രി മോദി മനസ്സിലാക്കി. അതിനു തീറ്റ കൊടുക്കാൻ അദ്ദേഹം ജീവനക്കാരോടു നിര്‍ദേശിച്ചു. വളരെ പ്രധാനപ്പെട്ട ഒരു യോഗത്തിനിടെ മയിലിനെക്കുറിച്ച് ചിന്തിക്കണമെങ്കിൽ അദ്ദേഹത്തിന് വളരെയധികം മനസ്സലിവുണ്ടാകണം.” -അമിത് ഷാ പറഞ്ഞു.
മാത്രമല്ല പ്രധാനമന്ത്രി നരേന്ദ്ര മോദി വളരെ കാര്യപ്രാപ്തിയുള്ള നേതാവാണെന്നും അമിത് ഷാ പരിപാടിയ്ക്കിടെ പുകഴ്ത്തി. ”പ്രവൃത്തിപരിചയം ഇല്ലാതിരുന്നതിട്ടു പോലും ഗുജറാത്ത് പോല ഒരു ഭൂകമ്പ ബാധിത സംസ്ഥാനത്തെ മുഖ്യമന്ത്രിയായി മികച്ച പ്രവര്‍ത്തനം കാഴ്ച വെക്കാൻ മോദിയ്ക്ക് കഴിഞ്ഞിട്ടുണ്ട്. പ്രധാനമന്ത്രിയ്ക്ക് ഒരു പഞ്ചായത്ത് പോലും ഭരിച്ചുള്ള പരിചയം ഇല്ലായിരുന്നു എന്നാൽ പ്രധാനമന്ത്രി എന്ന നിലയിൽ അദ്ദേഹം മികച്ച പ്രവര്‍ത്തനമാണ് കാഴ്ച വെച്ചത്’- അമിത് ഷാ പറഞ്ഞു. അതേസമയം പ്രധാനമന്ത്രിയ്ക്ക് മയിലുകളോടുള്ള താത്പര്യം പുറത്തു വരുന്നത് ഇതാദ്യമായിട്ടല്ല. 2020ൽ പ്രധാനമന്ത്രി നരേന്ദ്ര മോദി ഔദ്യോഗിക വസതിയിൽ വെച്ച് ഒരു മയിലിന് തീറ്റ കൊടുക്കുന്നതിൻ്റെ വീഡിയോ സോഷ്യൽ മീഡിയയിൽ വൈറലായിരുന്നു.
