പാലക്കാട്: അട്ടപ്പാടി കോട്ടത്തറ ട്രൈബൽ ആശുപത്രിയിൽ മുടങ്ങി കിടന്ന ജലവിതരണം പുനസ്ഥാപിച്ചു. മാറ്റിവച്ച ശസ്ത്രക്രിയകൾ തിങ്കളാഴ്ച നടത്തും. കൂടാതെ അടിയന്തിര സാഹചര്യം ഉണ്ടായാൽ ഉപയോഗിക്കാൻ രണ്ടു മോട്ടോർ വാങ്ങി ആശുപത്രിയിൽ എത്തിച്ചു. കനത്ത മഴയെ തുടർന്ന് ശിരുവാണി ഡാമിലെ ജലവിതരണം ഭാഗികമായി തടസ്സപ്പെട്ടതിനാൽ കോട്ടത്തറ ട്രൈബൽ ആശുപത്രിയുടെ പ്രവർത്തനം ആകെ താളം തെറ്റിയ അവസ്ഥയായിരുന്നു.
ആശുപത്രിയിലെ മോട്ടോറിൽ ചെളി അടിഞ്ഞു കൂടിയതിനെ തുടർന്ന് ജലവിതരണം തടസ്സപ്പെട്ടിരുന്നു. ഇതോടെ ആശുപത്രിയിലെ ശസ്ത്രക്രിയകൾ മുടങ്ങി. പല രോഗികളും ആശുപത്രി വിടുകയും ചെയ്തു. കിടപ്പു രോഗികൾക്ക് പ്രാഥമികാവശ്യങ്ങൾ നിറവേറ്റാൻ പോലും വെള്ളമില്ലാതായതോടെ വലിയ പ്രതിഷേധമാണ് ഉയർന്നത്.
സംഭവം പുറം ലോകം അറിഞ്ഞതോടെ അധികൃതർ അടിയന്തിരമായി ഇടപ്പെട്ട് മോട്ടോർ നന്നാക്കാൻ നടപടി തുടങ്ങി. ജലവിതരണം പുനസ്ഥാപിച്ചതോടെ ആശുപത്രിയുടെ പ്രവർത്തനം സാധാരണ നിലയിലായി.