തിരുവനന്തപുരം: സംസ്ഥാനത്ത് ഇന്ന് അർധരാത്രി മുതൽ നടത്താനിരുന്ന ഓട്ടോ- ടാക്സി പണിമുടക്ക് മാറ്റിവെച്ചതായി തൊഴിലാളി സംഘടനകൾ അറിയിച്ചു. തൊഴിലാളികളുടെ ആവശ്യ പ്രകാരം ഓട്ടോ-ടാക്സി നിരക്ക് വര്ധിപ്പിക്കാന് ധാരണയായ സാഹചര്യത്തിലാണ് പണിമുടക്ക് മാറ്റിവെച്ചത്. എന്നാൽ വിലക്കയറ്റം കൊണ്ട് പൊറുതി മുട്ടിയ മലയാളികൾക്ക് അടുത്ത ഇരുട്ടടിയാണ് ഈ തീരുമാനം.
അതേസമയം നിരക്കു വര്ധന പഠിക്കാന് ജസ്റ്റിസ് രാമചന്ദ്രന് കമ്മിറ്റിയെ ചുമതലപ്പെടുത്തി. യൂണിയന് പ്രതിനിധികളുമായി മന്ത്രി ആന്റണി രാജു നടത്തിയ യോഗത്തിലാണ് തീരുമാനം. യോഗ തീരുമാനങ്ങളുടെ അടിസ്ഥാനത്തില് ഇന്നു രാത്രി മുതല് പ്രഖ്യാപിച്ചിരുന്ന പണിമുടക്കില്നിന്ന് യൂണിയന് പിന്മാറി.
നിരക്കു വര്ധന വേണമെന്ന ആവശ്യം ന്യായമാണെന്ന് മന്ത്രി ആന്റണി രാജുവിന്റെ പക്ഷം. അത് എങ്ങനെ വേണം എന്നതില് കമ്മിറ്റി ശുപാര്ശയുടെ അടിസ്ഥാനത്തില് തീരുമാനമെടുക്കും. ഒരു മാസത്തിനകം റിപ്പോര്ട്ട് നല്കാന് കമ്മിറ്റിക്കു നിര്ദേശം നല്കും.
മിനിമം ചാര്ജ് നിലവിലുള്ളതിനേക്കാള് 5 രൂപയെങ്കിലും കൂട്ടണമെന്നാണ് യൂണിയൻ നേതാക്കളുടെ ആവശ്യം. മാത്രമല്ല ടാക്സ് നിരക്കുകള് പുതുക്കുക, പഴയ വാഹനങ്ങളുടെ ജിപിഎസ് ഒഴിവാക്കുക,സഹായപാക്കേജുകള് പ്രഖ്യാപിക്കുക തുടങ്ങിയ ആവശ്യങ്ങളും തൊഴിലാളികള് ഉന്നയിക്കുന്നു.
പുതിയ നിരക്കുകൾ പ്രാബല്യത്തിൽ വന്ന് മൂന്ന് വർഷം പോലും തികയുന്നതിന് മുൻപാണ് വീണ്ടും നിരക്ക് വർദ്ധിപ്പിക്കാൻ തീരുമാനിച്ചിരിക്കുന്നത്. ഇതിന് മുമ്പ് സംസ്ഥാനത്ത് 2018 ഡിസംബറിലാണ് ഓട്ടോ, ടാക്സി നിരക്ക് കൂട്ടിയത്.
